Luine dive, ano Evropake Qhibyengo dive o romane reprezentya: Osman Osmani direktori e BRO “Nevo Koncepti” thay Fatmir Menekshe direktori e BRO “Durmish Aslano” khetane e reprezentyencar kotar e Evropako Koncili, r. Tankut Soykan – Ofisesko talosheruno thay ry. Sakibe Jashari – ofisiyaluni jeni e proyekteski, realizinde yekh diskucia ano Ofisi e Komisionaresko vash Qhibya, e sheruna Sllavisa Mladenovic vash e Romana Qhibyako Statusi ani Prizrenoski Komuna.

Mladenovic sar sheruno e OFQh phikoinela e romengo rodlarin kay e romani qhib te penjargyol e statusea sar Qhib ano Ofisiyaluno Vastipe ani Prizrenoski Komuna, rodlarin vi koya phikoingyola kotar e Evropako Koncili.

“E kriseski dispozicia vash o Qhibya dela shayipe vash penjaripe e romana qhibyako sar qhib ano ofisionaluno vastipe ani Prizrenoski Komuna. Ofisi e Komisionaresko vash o Qhibya si palal e Romane Intelektualyengo thay Civilyune Organizacienga Rafinako mangipe kay te penjargyol e romana qhiyako statusi.”, phengya o r. Mladenovic.

Reprezentya kotar e Evropako Koncili, r. Soykan thay ry. Jashari mothavde kay e Evropake Koncileske principya thay moldipya phando vash o qhibyenge hakaya si mahatne vash sah o komunitetya.

“Konventa vash o haricune komunitetya thay Evropaki Karta vash o regionalune yase minoritetyenge qhibya, kola silen integralune kotora kana vakergyola vash o implementipe e e ververutne komunitetyenge qhibyenge hakayengo”, phengya e rayo Soykan.

Ani aver rig, o rayo Osmani sar direktori e organizaciako kova si pe qekat e akala inciativako mothagya kay ji akana dendile duy rodlarinya vash o Prizrenosko Sheruno, r. Shaqir Totaj, realizisali analiza akhardi “Sfide  e ofisialune penjaripesko e Romana qhibyako kotar e Prizrenoski komuna sar qhib ano ofisialuno vastipe” ano panj qhibya, kote interpretingyona o krisya vash o qhibya, administrativune instrukcie, thava kotar e Kosovaki Republikaki Konstitucia thay Evropaki Karta thay Konventa vash o Manushikane Hakaya.

“Akaya ver simen yekh baro phikoipe vash amari rodlarin. Ji akana 51 biraipkane organizacienge reprezentya, aktivistya thay penjarde personalitetya, qhivde po hrami vash penjaripe e romana qhibyake statusesko ano rodlarin koya direktingyola e sheruneske Totaj, lokalune thay centralune raipaske reprezentya phikoinena e inciativa, jikay reslilo ini ano uqhe instance sar si o phikoipe kotar e Evropako Koncili thay vi e Amerikaki Ambasadake reprezentya.”, phenla o rayo Menekshe kova yekhe dromeya si vi koordinatori e akale proyektesko,

Akava maladipe realizisalo ano kuadro e proyektesko “Promovipe e diversitetesko thay e Romana Qhibyako ani Prizrenoski Komuna”, kova implementingyola kotar o Nevo Koncepti thay phikoingyola kotar Evropako Koncili.