Arat pe rakyune orya ikliste pi konferenca vash medie o sheruno e Prizrenosko Mytaher Haskuka thay o Direktori e Sastipaske Direktoratesko, r.Visar Shehu vash te mothaven thay te janglaren vash o neve surya kola ikliste pozitivune tari Prizrenoski Komuna.

O Haskuka janglargya kay mashkaro testya kola ule adive ano laboratori e IKSHPK-esko 30 sine kotar e Prizrenoski Komuna. Akale 30 jenendar kola sine manusha kontakti vay familiake jene e infektime manushenge 5 ikliste pozitivune e e virusea COVID-19.

Shtar (4) si andar e Prizrenoski komuna thay yekh si ano gav Skorobishta, kova araklola ani periferia/krayo e dizyako. Mashkar akala persoyna yek si familiako jeno kotar o Doganieri kova identifikisalo angle nesave dive thay yek familiako jeno e infermieresko tali Skorobishta kova kerla buti ano Prizrenosko Hospitali.

“Thay 1 jeno si kotar o komunitetya rom, ashkalie, egipqayna”, phenlla o Direktori e Sastipasko ano Prizren, r.Visar Shehu. Numay on najanena pandar ko si o persoyna vash te len o aver preventivune mase thay te testirinen e kontakt manushen thay familiake jenen. “Na janlape pandar si mi mursh vay juvli numay amen siyem te la sig kan. Palo dova amen yekhatar ka dezinfektirina odola mahale kote akala infektime manusha siton pe jivdipe”, phenlla o direktori thay o Koordinatori kova menaxhinella akaya situacia ano Prizren. O r. Mytaher Haskuka, sheruno e Prizrenosko phengya kay o manusha na manllape te daran vash te mothaven kay silen o simptome.

“Nasi laj te ove nasvalo, vi o sherunoministri e Britaniako, Boris Johson, astardilo ano akava nasvalipe. Te sine kay tumen situmen nesave leparde simptome rujinavtumen khareni o gendo 194 kote amare ekipe sit e aven vash te ajutinen tumen thay te akseptinen situm vay na situmen o nasvalipe, vay siyen mi infektime e leparne virusea”, sine alava e sheruneske.

Pe agor o sheruno Mytaher Haskuka dengya nesave undara, kolenda si: Besheni khere! Ma garaveni o simptome! Ma rizikineni tumari familia! Thay sa o ekipe si ano tumaro disponipe!