Aktualune Nevipya
Na skoluipe thay diskriminipe si faktori kay e romengi socio-ekonomikuni situacia si bilaqhi
- 16/07/2021
- By Romano Avazo
Direktori e humanitaruna organizaciako ‘Terzi Mahala’, o Fikrim Menekshe sine kotor e emisiako kote tretirisali e tema ‘E romengi socio-ekonomikuni situaci’.
Mashkaro leske respondipya thay gandipya phando e romenga situacia, ov phengya kay e nashukarni situacia e romengi dengya ideya e avrunenge, e diasporake romenge te formirinen yekh organizacia koya ka del phikoipe akala kategoriake.
“Ini seske siyem ano yekh nevo periodi, o roma pandar si ani nashukarni pozicia, yekh e faktoryendar kay e situacia si agyar si o na skoluipe e romengo thay o diskriminipe ano bukyake thana, thay akale sebepestar on na lelona pe bukya. Akava rezultinla kay o roma te oven qorole.”, phenla o rayo Fikrim Menekshe.
Ov mothagya kay e organizacia ‘Terzi Mahala’, mashkaro 65 kotorleutne kay pokinena qhonesko participipe thay ani sakoya akcia dena poro financionaluno kontributi, si sebepi kay ano agorune 3-4 bersha dendile buderi pasharipya e romenge kola silen phare ekonomikuni kondicia. O pasharipya kola dendile si: ulavipe e paketyengo vash o qorole familie, kontrolipe e phurenge sastipesko, phikoipe e nasvelen, iftarlukya thay sfurya ano ramazanoske qhonya, ulavipe e kashtengo ano yevendune qhonya, qhinipe e kurbanyengo thay ulavipe e masesko ano islamikune feste/bayramya.
Yekh e sakole qhoneske aktivitetendar si ulavipe e paketyengo 15 familiengo kola si ano may phare qorolipaske kondicie.
“Desar akale pasharipyendar, amen kedingyam 10 mile 250 euro vash yekh familia, kolenge ka kingyol than, thay palo akava ajukera o azhutipe e komunake instituciendar, biraipkane organizaciendar thay e politikune subyektendar te adikeren poro lafipe kay te keren kher akala familiake”, phenla o Menekshe.
Sasavipea, e organizacia ‘Terzi Mahala’ na sila ledeipe e politikune subyektyencar kotar o romano komuniteti, ni o nakhle ni o akanutne politikune subyektya.
“O politikune subyektya silen may baro avazo, thay amen ajukera kay beraber olencar te putara buderi udara kola ka oven sebepya kay amen te phikoina e romane komunitete, feri so on silen po baro autoriteti thay direktno silen rola ano leipe e deciziyengo ko raipe.”, phenla o sheruno e organizacako ‘Terzi Mahala’.
Pe agor, ov mothavgya kay ano avutno kurko on si te qhinen po buderi se 53 kurbyanya kola ka ulaven ano sakola mahale kote jivdinena o romane komunitetya kolengi ekonomikuni situacia si bi-laqhi.