Ijune diveste Ministria e Sombeshipaski sikakgya yek draft dokumenti,kova pana na sila agorimi forma,numay pe kolate vakergyola kay pucipe vash liberalizip e vizako vash kosovo isito pana ano diklaripe. “ Sombeshipe isila pe dikhipe vasnipe vash liberalizipe e vizako vash kosovake dizune.Komisiya formaluno dengya propozipe pe chon mayo 2016.bersheste transferi e Kosovako ani tromali cham Shengen thay anglodiklargya pe chon yulo 2018.bersh vash pheripe aver kriteriyum pe chon Marto 2019.bersheste.

Evropako parlamenti phikoingya Komisiyako propozipe ano angluno diklaripe.Decisiya truyal propozipe aktualuno diklargyola ano Sombeshipe”, vakergyola ano agorutno nahtari Evropaka Uniyako. Numay, Evropaki Uniya dengya nota kay Kosovo phergya sah o ultimatum vash cidipe e vizako,a odova konfirmingya ani divuni cham “Zeri” Uci reprezenta Evropaka Uniyaki ano kosovako srbyuno dialogi Federika Mogerini. “Yulo 2018.bersh Komisiya konfirmingya kay Kosovo phergya sah o standardya vash liberalizipe e vizako, leipe kotor ratifikipe e lekanipasko vash demarkraciya e Montenegroa,thay pheripe ultimatum vash mareba mamuy organizipe vash korupciya”,vakergyola mashkaro sah ano respodipe Mogerini. Sherunominstri e Kosovako Ramush Haradinay palo Samiti ano Berlin,deklaringya kay lela phikoipe kota Germaniya vash mekhipe e vizako vash kosovo,thay pakyavipe kay akava shay te ovel ji pe agor e chonesko yuno pe akava bersh. Ov ano poro Facebook pelargya pe godi kay pe chon marto akale bersheste Evropako parlamenti phikoingya poropozipe Evopaka Komisiyako vash cidipe e vizako vash kosovake dizune.

Ani konferenca vash stampa,kote komentinde akava proyekt Dokumenti Evropaka Uniyako,Haradinay deklaringya kay shay te kera yaveripe feri so akava dokumenti ovela vash agoripe a na decisipa. Deciiya e Kosovake sheruneministresko ulavla ini Aliyanca vash Kosovako Avutnipe Donika Kaday Buyupi, koya vakergya kay pe chon marto nakle bersheste Kosovo phergya agorutno kriteriyum,demakraciya e samatradaki e Montengroa thay kay aktualuno Raipe angazhingyola kay dizune lena liberalizipe e vizako akale bersheste. Taksa thay Asociyacia(srbyune komunake) na phangyona vash viza. Rodena kris thay rodena ovipe antikonstituciya isitoy na propocionaluni”,vakergya Buyupi. Oy vakergya kay cidipe e decisipasko pedero yek taksa pedero srbyuno mali yase aver kriteriyum vash yaveripe e vizako, Kosovo na ka lel pe konsideripe. Oy lela pe konsideripe kay Koosvo shay te kerel pana buderi kana isito o pucipe raipyuno kris,thay kay shay akava te phanglol vash achavipe kota rezimi e vizako. Demush Shala,shukarno penjardo evropaka integraciyako thay direktori institutesko “Epik”, vakergya kay na si buderi kota Germaniyaki rig kay phikoinla vash leipe e vizako vash kosovake dizutne.

“Aver,decispe vash vizako pucipe,ka anen 28 thana kota EU,ayeka kay shay te kerope buderi buti ayeka kay te ovelolen pherdo pakyavipe sar siton,Franciya thay Holanda kay Kosovo jala angle ano mareba mamuy korupciya ano uco niveli,feri so isito vasno achavipe akale thannego.

KosovaLive- Violeta Oroshi Berishaj