Ano rami e proyektesko “E qhavorenge hakayengo raipe” kova phikoingyola kotar o ‘Save the Children’ thay implementingyola kotar e BRO “Nevo Koncepti” ani Prizrenoski komuna funksioninela e Qhavorengi Asamblea.

Qhavorengi Asamblea phiravela buderi procesya kola direktingyona kotar o siklovne e fundune skolenge thay sah o qhavore ani Prizrenoski Komuna.
Sheruno e Qhavorenga Asambleako, Jashar Misini thay e sekretarka. Hesa Nuhiu lele kotor ani yekh emisia ano romano radio “Romano Avazo”.
O res e emisiako sine te mothavel thay te labyarel e Asambleaki rola thay funksionipe.

“Qhavorengi Asamblea ano Prizren kreirisali ano bersh 2017 kote o yekhuno res sila te garavel e qhavorenge hakaya” phenla o sheruno, Jashar Misini.

Mashkaro ververutne aktivitetya missal: traynipya, rodlaripya thay avokipe, e asamblea resela te ovel may zoralo avazo e sah siklovnenge thay qhavorenge ani Prizrenoski Komuna.

13 fundune skolenge may suksesune siklovne lena kotor ani Qhavorengi Asamblea, kote ani sakoya funduni skola kreirinla yekh Godideutni Grupa thay votuinena kova siklovno te lel kotor ani Qhavorengi Asamblea. Desar o reprezentipe e sakola skolako ani Asamblea, kotorleutne si vi sakole komunitetestar.

‘Sar si vi o Prizreno multietnikuno, vi amaro avazo manglape te ovel sah-uqhardo thay multietnikuno. Kayeka kay, ani Asamblea lena kotor o qhavore thay siklovne e komunitetyendar roma, turkya, boshnyakya thay o albanya.’, phenla o Misini.

Mashkaro lafipe e duy reprezentyendar mothavdilo kay e Qhavorengi Asamblea sila buderi aktivitetya kola vazna e siklovnenge kapacitetya, kerna rodlaripya vash te laqharen e qhavorengi thay siklovnengi situacia thay mashkaro avokipe adresinena buderi problematike kola mamuyingona o Prizrenoska Komunake Qhavore.

“Qhavorengi Asamblea sila ledeipya thay lekanipya e Prizrenoska Komunake instituciencar, kote may zorale khetano butikeripe realizinla e Edukipaske Direktoratea, Kulturake, Ternenge thay Sporteske Direktoratea, direkno e Prizrenoska Kupatna thay lake sherunea.’, phenla e sekretare, Hesa Nuhiu.

Desar akale ledeipyencar, e Qhavorengi Asamblea sila ledeipe vi e biraipkane organizaciencar, sah e siklovnencar thay e mediencar, ano akava suro sar amencar, radio ‘Romano Avazo’ yekhutni e romane mediendar ano Prizren.

Vash po buderi shunen e emisia ani facebookeski qham@Radio Romano Avazo