Lungo vahti isito na lekanipe andre  kosovaki raipyuni koaliciya,ulavipe kana isito pucipe phiravipe e diyalogesko e Srbiya.Sherunoministri Ramush Haradinay na mekla vast kota presia e partnerengi kota koaliciya te suspendinel  taksa pedero inporti e srbyune malyengo  ano  nesave chona ayeka kay  shay o diyalog  ano Bruksel  te phiragyol,pe kolate insistirina  them tha som jene Evropaka Uniyake.

Leipe pe dikhipe phari komunikaciya e  sheruneski Haradinay thay Kosovako presidento Hashim Thaqi,kova insistirinla ano koorijipe e samatradako e Srbiya,kosovake analiticarya  na frdena kay akaya koaliciya te rumingyol angledo agoripe e mandatesko e 2021 bersheste.

Ayeka godinipe ulavla ini politikologi Ramush Tahiri.Ano intervyu vash “Epoka e  re” vakergya  kay kana Demokrativuni Kosovaki Partiya kota Kadri Veseli  pasharla eventualune partnere shay  te shrdel procesi e pelaripasko  Raipe Haradionay.

Pe akava konteksi Tahiri vakerla  kay achilo te reslol  sekretyno lekanipe mashkar Demokrativuni Kosovaki partiya thay Opozicioni  demokrativuni  Aleanca e Kosovaki Isa Mustafa thay vakerla kay negocie mashkar duy riga  isiton  ano phiravipe.

Sasavipeya,palo avrokrisyuno alosaripe kova pe 19. Mayo ka adikergyol  vash sherune ano shtar komune ani nurduni Kosova,eventualuno anglovahtyune parlamentarune alosaripya,sasavipeya te sine  kay phergyona  leparno kriteriyum,shay te  deklaringyon ano sah Kosovako teritori.

Numay,komunake anglovahtyune alosaripya ani nurduni Kosova adikergyona  palo mekipe kota sherune,pe novembro nakle bersheste,a sar sheruno sebepi  isito  leipe pe konsideripe  decisiya e Kosovake raipesko vash inporti e srbyune thay bosnake malyengo.

Ani pashirat ofisionaluno shrdingya  angloalosaripaski kampanja vash avrikrisyuno alosaripe  vash sherune  kota shtar komune ani nurduni Kosova,nurduni Mitrovica,Zubin Potok,Zvecane ano Leposavic, thay ka lungyol ji  pe  paraskini dive 17 mayo.

Ano alosaripe ka khelen trin politikune subyektya,Srbyuni lista,Korkorodecipe thay Demokrativuni kosovaki Partiya,  kota sa o sa 12 kandidatya kola ka len kotor ano alosaripasko procesi.

Kandidati kota Srbyuni lista vash sheruno  kota komuna Leposavic Zoran Todic vakergya vash RTS kay dizune kola jivdinena ani nurduni rig,but bersha  jivdinena ano na  siguripe”thay vakergya kay isiton gatisarne “ te marenpe feri so akata na si iranipe”.

Todic  vakerla  kay so may baro gendo e manushengo  iklola ano alosaripe kay  ka ovel po klaruno yek mesazhi  vash autoritetya  e Prishtinake thay mashkarselikano kethanipe   so Srbya ani nurduni Kosova mangena thay  rodena.

Numay, Centraluni Alosaripaski Komisiya,deklaringya kay  o alosaripya  shay ka adikergyon ano 87 votuipaske thana,kay alosaripasko procesi ka phiravel 670 somjene e komunaluna alosaripaski komisiya,thay hako e avazosko isi pashe 60 mile dizune.

Avrirenduno alosaripe ani Kosova ka adikergyola  kota kosovako alosaripasko kris,thay tehnikuno phikodeipe ka pasharel Misiya OSEB.

Phiravni e Centraluna  Alosaripaski  Komisiyaki  Valdete  Daka  deklaringya  ano intervyu vash “Epoka e re”, kay na ajukerla problemya  phando  vash  alosaripaski organizaciya  ani nurduni Kosova.

Ano pucipe  shay alosaripasko procesi  te ovelole bibahtagor,Daka vakergya  kay shay te vakerel korkoro  vash tehnikuno aspekti thay kay kota politikune phiravne umlavgyola shay mangena te len kotor ano alosaripe yase na.

Aver rig, phiravno kota Vetvendosye Albin Kurti vakergya kay dizune ani nurduni Kosova vash hako e avazosko isilen duy alosaripya pe despozicia.Yase te votuinen vash Srbyuni lista thay Demokrativuni Kosovaki partiya”,koya na khelela  e yekhune kandidateya numay isilen  yekhuni politika”,yase Vetvendosya koya prezentinla korkori alternative vash Albanya,Boshnjakya,Turkya thay Roma.

Kosovake analiticarya  na ajukerna  kay pe lungipe  alosaripaske proceesko  vash phiravne ani nurduni  kosovaki komuna reslol  tenziya kola bilacharna sarsakanutno  siguripe,feri so srbyuna lista nasila konkurenciya kota aver politikune partiye koya kedikarla  Kosovake Srbyen.  Sasviepya na ajukerna  ini may baro iklipe e dizutnengo ano votuipe,ulavipe palo murdaripe”phiravno e kosovake Srbyengo,phiravno e partiyako”,Tromalipe, dogryuni demokraciya”,Oliver Ivanovic.

KosovaLive- Violeta Oroshi Berishaj 

Vash  Radio Romano Avazo Vera Galush Paqaku