Sherune negociaka ekipake vash diyalog e Srbiya,Fatmir Limay thay Shpend Ahmeti, ijine diveste bizo informipe lele drom ano Bruksel  ayeka kay   e uce  kabineteske  reprezentyenca Evropaka Uniyake Federika Mogerini  diskutinde vash “shayutno”  dialogi.

Fatmir Limay palo iranipe deklaringya  kay pe lungipe e arakhipasko  lepardilo  ini problemi  e prezentuna  tarifako kota 100% pedero srbyuno thay bosnako mali,koya vash Srbiya isito achavipe vash phiravipe e diyalogesko thay vakergya  kay  sigate  palem ka lel drom ano Bruksel.

“Shay te iranape ani masa thay vakera   vash puterdo pucipe  kova isimen e Srbiya. Pakyava kay  Platforma (vash diyalog) shay te bichalgyol pe avutno kurko.Kergyam shayutno modeli  e diyalogesko.Akava diyalog shay te jal direktipa vash lekanipe,e ultimatumeya kova vazdingyem Srbiyake”vakergya Limay.

Kriteriyum isila ini Srbiya vash phiravipe e diyalogesko. Kota Kosovako raipe  mangena te achagyol decisiya vash taksa ano inporti  srbyune malyengo,numay ijesta insistirina  te cidel Statuti  vash “Trepca”,kova  isito   kota   rig  e deputeyngi  pe lungipe avutne kurkosko,ayeka kay shay te ovel kotor e diyalogesko ano Bruksel.

Sherunoministri e Koosvako Ramush Haradinay, angya decisipe  te  na  cidel decisiya vash taksa ji kay Srbiya na penjarla Kosovo,a respodipe  kota avazdeutni Evropaka Uniyaki Maya Kociyancic,ano pucipe  kota srbyuni Agenciya “Tanyug” phando  vash Statuti e “Trepca”kay ano Bruksel shay te vakergyol vash savore puterde pucipya kola isila  duy thana”…,diklola  kay bilacakargya komunikipe  ani relaciya Kosovo-Bruksel.

Angluno reangingya sheruno Haradinay  kova  deklaracia kota Maya Kociyancic dengya nota  bizo procenti,na leipe pe konsideripe,thy kova calavla  Kosovako sovraniteti,vakeripa kay Bruksel nashalgya busola thay kay na janla poro godornipe.

Prekal rafin Facebook, vakergya  ini presidento  e parmantesko Kadri Veseli,kova hramingya kay “Trepca”,na sine,na  sitoy,niti ka ovel  puterdo pucipe ano diyalog e Srbiya.

“Akalea  Evropaki Uniya aravla sakoya perspektiva e diyalogesi thay shukarne mikya.”Trepca”, isito naturaluno dogripe e themutna Kosovako.Adive thay  sa vaht”,hramingya Veseli.

Sasavipeya  reagingya ini Isa Mustafa, deipa nota kay ideya vash “Trepca”,apsurdno  vakeripe,koba sine ovla ini ideya kay ano Bruksel phiragyola diyalog e  Kosovaka samatrada.

Ji kay  Zafir Berisha  diklarla kay Evropaki Uniya  isitoy ano hor andripe e politikuna krizako,thay kay Kosovo  nay  pokinla faktura olaka krizako,yaveruno Enver Hojay  vakerla  kay isito shasherimo (shokirimo) e deklaracia  kota Maya Kociyancic.

Publicisi  Veton  Suroi konsiderinla kay rovlarin Evropaka Komisiyaki   kay Statut “Trepca”, ovla kotor  e negociako mashkar Kosovo thay Srbiya  naturaluno principi  kova ji akana Kosova  lela pe konsideripe.

“Pe  lungipe e nakle efta bershengo,Kosovo lela pe konsideripe te vakerel e Srbiya thay dakordisale  sar te  organizingyon Koosvake komune, kova selikanipe (nacia),shay te ovel komandiri policiako thay daviutno   Apelesko kris ani Nurduni Mitrovica  thay koba lungo  shay te ovel zido ano mashkar  e Mitrovicaka dizako.

Numay,inplementipe  Statuti “Trepca” akaya kombinaciya  shay te registringyol  sar Akcionaluno amalipe,kote sheruno   akcionari te ovel them,kota 80% akciya,thay  vash 20% akciya te ovelola butikerutne.

Valdrin Luka,vash Radioteleviziya Kosovo(RTK) deklaringya kay “Trepca”,na sito politikuno pucipe.Ov vakergya kay Kris thay Statuti e “Trepcako”,isito anglodiklardo te themelingyol yek Bordi kota inja somjene(pe koleste  sine ovla trin srbyune  somjene)  thay  te decisinel vash lekanipe kota eksporti “Trepca”.

“Amen shay te ja angle thay isimen pozitivuno  kota savore  riga  kana vakergyola  ano tehnikuno aspekti,numay sa yaveringyola kana khuvna  ano politikuno aspekti,vash koleske  na si manglo. Isi gatisaripe kota savore riga te jal anglipa thay interesipe  vash “Trepca”deklaringya Luka.

Avazdeutni   EU Maya Kociyancic vash Radio “Glas Amerike”(Amerikako Avazo)  vakergya   kay pucipya vash negocie kola vakergyona  yase  ka vakergyon na  ulavla Evropaki Uniya,numay  rig ano diyalog. Oy palem  rodingya kay Kosovako Raipe  te cidel decisia vash taksa  ayeka kay shay te  ovel   diyalog ano Bruksel. Sheruno  Haradinay  vakerla  kay Kosovo,niyek ver  na sinole ultimatum vash diyalog,thay kay decisia vash takse  ano srbyuno mali  sine inponimi,sebepi  e  Srbyune prezentipasko  prekal Kosovo,ayeka kay  Srbiya dela ultimatum  vash phiravipe e diyalogesko.

KosovaLive – Violeta Oroshi Berishaj

Radi Romano Avazo –Vera Galush Pacaki