Angle nesave dive, ani emisia Context ano ATV koya phiragyola kotar o jurnalisti Leart Hoxha, sine akhardo o taloministro ano Obligipe kotar e Ministria vash e Kultura, Terne thay Sporti, r. Suleyman Elshani, ex jurnalisti e Radio Romano Avazosko thay ex butikerunto e BRO “Durmish Aslano”.
Numay ani emisia, ov kergya bi bazirimi kritika prekal o romane medie phenindo kay on nane abokar avansine thay ji akana simen saday yekh profesionaluno jurnalisti. Desar akalestar ov akuzingya kay ini kay ekzistirinela yekh romano radio ano Prizren on promovinena saday pere aktivitetya thay niyekh ver nane akhardilo ki akaya media.
Direktori e BRO Durmish Aslanosko thay sheruno redaktori kova phiravla vi o Radio Romano Avazo kergya yekhatar yekh reaguipe thay demanti vash leske dezinformacie numay pe romani qhib feriso na mangla pe pelarel e romengo imazhi sar kergya o rayo Elshani.
Dezinformacia si kay nanemen saday yekh jurnalisti profesionaluno, simen trin ji shtar: Daut Qulangjiu, Denis Galushi thay Benjamin Menekshe, Ertan Galushi kola so shtar agorinde ano Kolegji AAB. Desar akalestar si buderi jurnalistya kay na agorime jurnalistika numay mashkaro treningya thay eksperienca resle te oven suksesune jurnalistya sar yekh vahti kay sine vi akava taloministro.
Akava si telaripe e romana historiako thay imazhesko, feriso vi o Albanologi: Nusret Seharsoj ini soske na sine agorimo jurnalistika ov sine jurnalisti ki RTP kova adikergya emisie pi albanyuni qhib, palo leste o Ibrahim Elshani – sine pedagogi numay vi ov ningargya angle e romani jurnalistika thay publicistika, thay napal avla o Kujtim Pacaku – kova agoringya muzikake mediengi academia numay kergya buti sar jurnalisti thay ningargya angle e romani jurnalistika, e te na vakera vash o Nexhip Menekshek ova agoringya funduno siklovipasko fakulteti thay na saday kay sine lideri e roamane informipasko numay vi kreiringya o Radio Romano Avazo.
Radio Romano Avazo ji akana realizindo milioynencar emisia pe romani qhib thay tretirindo o problematike mashkaro debatya thay emisie avokipa te laqhargyol e romani pozicia.
Romano Avazo mashkaro akala 5 bersha thay vi may angle sinele vizita kotar o sheruno Albin Kurti kolea adikerdili emisia, rayni Emilija Redzepi, deputetya thay sherune e komunenge vi direktorie thay aver ofiserya. OSBE-esko, Britaniake Concilesko thay buderi evropianyune rashtrenge ambasadorya thay liderya da ale ani vizita ko amaro radio. Sah akala liderya lele amare raportya thay rekomandipya, feriso buderi analize kola kergyam sar media si ano favori e romengo e na e amare aktivityengo.
O aver alav kay vakergya rayo Elshani si kay o Romano Avazo promovinela piri organizacia. BRO Durmish Aslano – saday ano Aprili realizingya prekal e Dramako departamenti drama thay khugya ano repertuari e Profesionalune Teatrosko Bekim Fehmiu, realizingya Solemyuni Akademia ani Prizrenoski Kupatni – pe 8.to aprili ano khetane butikeripe e Prizrenoska Komuna, kontribuingya ano publikipe e yekhta dramako kotar o Nexhip Menekshe “o Kamberi thay e Leyla” thay pe agor kontribuingya ano dokumentarni film “Horo ano Boro”.
“Akala aktivitetya na promovingya thay informingya o radio Romano Avazo, numay may buderi se 15 medie kotar e Kosova kote akhardema ano intervistipya thay shay te phenav sah e Kosovaki kulturako imazhi laqhara amen thay na tu sar kulturako talominstro”, phenla o direktori Fatmir Menekshe.
E Radio Romano Avazo, vizualizisalo thay kerela buti ano kualiteti e yekha televiziako e na saday radiosko. Thay sah e Kosovake bare medie sar: RTK, Dukagjini, Telegrafi, Klan Kosova, T7, KosovaPress, Koha Vision thay RTV21, vi o lokalune TV Prizreni thay BESA, silen ledeipe amara media vash informacie vash o romano komuniteti.
O radio Romano Avazo anglune 2 bersha phikoingya promovipa e LPRK partia numay vash e bibaht e presia thay o na lekanipya mashkaramende kerdemen te decizina kay ma te hramino niso so kerla e partia, ano aver drom vi o skandalya yase o bilaqhe bukya so shay kerla akaya partia.
Odoleske amen nikana sar mediumi na postingyem nevipe kay o ex deputeti qhelale vastingya e pozicia kote sah e Kosovake medie ulavde lesko video sar khelele toto-sport, numay amen na. Sar ikliste o skandalya vash lekanipe vash asistenti kay lelile familiarune jene, numay amen nikana na kergyam nisavo info vash akava, sar na siyan gelo ko toro bukyako thay siyan beshto may but ano ofisi ano Prizren, sar qhelale vastisali e vrda, sar dendilo proyekti e deputeteske phraleske kova na lepargya e romane gilengo resursi thay ushkavgya o autorsko hako, thay but aver informacie qhelale vash tumen na siyem kerde, saday te na rumina e romengo imazhi.
Me korkoro mo hramipe kergyum pe romani qhib saday mash te len kan o avera kay me te iklove sar jeno kova atakinla e romane medien, kolendar siklilo thay avansisalo.
Thay akana, siyem te adikera yekhuno prastav, o bilaqhe bukya kola kerna ano dizfavori e komunitetesko yase lenge partiake decizie ko te nakhel ano KQZ yase aver thana amen nashti himinaape, feriso te sine legalno odova vi ovela.
Sasavipea, amen ka aqhola lideri e informipasko pi romani qhib, promovipe e romana kulturako thay identitesko thay ka avokina mashkari media thay BRO te avansina amare kontributea e romane komunitete.
Akaya reakcia hramisalo kotar e redaktori Fatmir Menekshe
