Publikako Sastipasko Nacionaluno Institui informingya e Komitete vash Epidemikuni Inteligencia thay e Komitete vash o Nasvalipya kola Lelona, adikerapa yekh kedipe, kote diskutinde vash e globaluni situacia vash o virusi “Nipah”.

Vash o RTK on mothavde o aktualune moldipya e Komitetyenge, kay o reziko vash e Kosova si tikno, numay vi o OBSH thay o aver organizacie moldime o phayaripe aqhola sporadikuno, lokalizimo thay shayipe te limitingyol leskoro buhlipe avri Indiatar, kote identifikisale duy surya.

Vi ayekha, o Komitetya rekomandime te buhlargyoll o epidemiologikuno dikhat thay te bayrol o sastipaske sistemesko gatiseripe, ini soske ani akaya faza na manglape publikuno alarmi yase reziko vash e Kosovaki populacia.

O eks deirektori e IKSHPK-esko, Naser Ramadani, phenla kay e sastipaske ekspertya phenena kay akava virusi te sine kay phayrola, o ziyayna shay te oven but phare.

Yekhe dromea kerla apela vash te informingyon shukar o dizutne vash ma te peren talo dezinformacienge darakeripya vash bi mangli panika.

Virusi shay te giriqinel kotar o hayvayna ko manusha. May zorale resursya e infeksiake si o frutyenge korolelilikya, kola amende na arakhlona thay o virusi pandar na phiravgyola mashkaro vazduk.

O simptome si: shillalipe, sheriski dukh, konfuzia, pharipe ano duholeipe.