Pe 19.to oktombari ani Kino Armata, ani Prishtina adikerdilo o Roma Film Festivali – Shifting Realities kotar e Roma Versitas Kosovo.
Roma Film Festivali ake o trinto bersh realizingyola kote sar yekh disuno aktiviteti startinla ani Prishtina, thay o duyto dive iklola avri Kosovatar, sar ano yekhto bersh ani Tirana, duyto bersh ano Zagrep thay akana ano Berlin.
Startipa e Press konferenciatar, kote o Avni Mustafa thay o Elvis Avdi prezentirinde akale bersheske aktivitetya, yekhatar alo rendo vash yekh paneli kote o trin penjarde aktivistya sar si o Fatmir Menekshe, Gynesh Veshall thay Almedina Skenderi, mashkaro moderipe e Alisan Skendereske, realizinde yekh laqhi diskucia vash e romani kultura, identiteti thay festivalesko avutnipe, kola mashkaro pere eksperience dende ver-verutne ideye thay misalya vash e paneleski tema.
Napal pe ora 18:00 puterdile e Kino Armatake udara vash e romani audienca, kote sine yekh baro gendo e kotorleutnengo ani akaya festivaleski rat.
Duy mahatne misafirya sine o taloministri vash o Terne thay Sporti, r. Sejnur Veshall thay e talominstra vash e Kultura thay Turizmo, ry. Tijana Veljkovic, kola yekhe dromeya vi adikerd lafipe.
Desara kale misafiryendar sine vi ver-verutne organizacienge reprezentya, institucienge thay ambasadenge.
Napal startinde o performance kotar o Edis Galushi, Visar Kukaqi thay Jimi Mustafa. Palo performance mekhlile o duy filmya Diferent Realities thay Shifting Realities.
Pe agor, ano holi e Kino Armatako prezentisali e ekspozicia kotar o Ridvan Gashi thay o romane tradicionale habe, kola sah akala amalisale yekha performanca kotar e penjardi muzikaluni grupa Jimmy Mustafa Band.
Pali Prishtina, o festivaleski grupa yekhatar lele drom kay akava aktivitetya te prezentirinen vi ano Berlin mashkaro ERIAC.
