Daut Qulanji biyasalo pe data 28.06.1971 ano Prizren, agoringya o fakulteto vash Masivuno komunikipe thay Zhurnalizmo ani Prishtina kote ini kerela buti sar redaktori ani RTK-eski romani redaksia.

Daut Qulanji sine presidenti e organizaciako “Durmish Aslanosko” ano bersha 2000-2003. Ov lela kotor ano aktivitetya e kulturake spektreste sar koreske, folklorune thay orkestrune akviteteya kote 14 bersha sine penjarno fokloristi e KAA “Agimi”.

Penjaripe e romane teatroa ulo ano bersh 1992. Sine yekh e anglune artistyendar e romane teatroske. O Daut Qulanji aktringya: e Gania ani yekhto drama e romane teatroski “O kamipe na Puqela”, e Julbo ani drama “O Spiuni”, e Limane ani komedia “Kamberi thay e Leyla” kote triumfingya e poqin “Galbeno Phabay” sar may laqo aktori ano festivali e teatrosko kova adikerdilo ano Prizren, e Viqa miliciako oficeri ani komedia “Bi pakyavno muy” thay sine asistenti e rejiako ani akaya drama. Sine skenografi ani drama “Prizren Via Essen”, khelgya e sheruni rola e Jemileski ani “Magia” thay sine kostimografi akala dramako, palo akava ov sine sakoya ver pashe o Romano Teatro sar jeno kola alosarela o muzikake efektya ani drama “O kamipe na puqela” nevi verzia, “Lejla thay Kamber” nevi verzia, khelgya e Bardule ani drama “Tara morkyatar nashti te iklove”, e dade Sadiko ani drama “Prizren via Essen” nevi verzia, kote alosargya vi o muzikake efektya thay pe agor sine kostimografi ani komedia “Keqap Klasa”.

Palo akava shrdingya te kerel buti ani Romani Redaksia ano RTK thay e bukyako sebepi o rayo Qulanji nasinele shayipe te lugyarel poro kontributi sar aktori ano Romano Teatro numay ov sakoya ver sine e anglune manushendar kola shrdena te gatisarenpe vash o neve drame. Lela kotor ano grupe kana alosargyona thay angyola decisia vash e bershuni drama.