Informingyona sah o romane dizutne kotar o sah Kosovake Komune thay may dur, diaspora, kay o Bayrako ani Terzimahala si te iklol pe savatone dive / derneg pe ora 16:00.

Ano akava shlbershengo manifestipe kova phiragyola kotar e Familia Mulamisini thay sah e Terzimahalake roma, barikanipe si te realizingyol vi akava bersh.

Ano akava bersh o Bayrako si te iklol kotar o Elvedar Mulamisini, thay e Terzimahalake roma si te pashon feriso dende lafi yekhe-yavereske kay te garavgyol akaya mahatni tradicionaluni festa, saday reduktipa nesave adetya yase tradicia kola dikhlargyona sar shirki.

Pe shrd, me o Fatmir Menekshe sar promotori e romana kulturako thay tradiciako khetane e aktvistyencar Daut Qulangji, Avdi Misini, Sebajdin Avdo thay sah o Phrala Mulamisini, pe qekat e Elan Mulamisinea thay Elshan Mulamisinea, vi ayekha ano amalipe e Arton Vejselea kova phiravela diasporatar o humanizmosko aktivizmo, lelampe kan kay e festa te manifestingyol saday kheripa dikhat te ulava o sheya kola si shirki: sar qumipe o bayrako, deipe nerzi thay qhinipe varesave kurbani vash oleske.

Ani aver rig, akava bersh na ka oven ni Goqyengo bashalipe, numay lenge thane si te ovel Kur-anesko gilaipe, Ilahie thay Dersi ano Terzimahalako Parno Kher.

Akava bersh si te ovelmen misafirya vi kotar e Turkyuni Ambasada, sar o taloambasadori kotar e Prishtina, Kulturako Godideutno kotar e Turyuni Ambasada, Siklipasko Godideutno, Godideutno vash o Dineske/Religiake Servisya, e Yunues Emre Institutesko Kordinatori vash e Kosova, Maarif Fondaciako kordinatori vash e Kosova, TIKA-ko kordinatori vash e Kosova, Prof. Dr. Ahmet Tasgin kotar Haci Bayram Veli Universiteti ani Konya, Prof.Dr. Osman Atalay – IHH bordesko kotorleutno, Reprezenti e UKID-esko ani Kosova, thay Fadil Puskolli kotar Kosova Post vi o khetano butikerunto profesori ani Turkologiako departamenti ani Prishtina Fatih Kemik.

Sasavipea, o Bayrako si te putergyol doayencar, si te iklol ani mahala tekbirencar thay si te iranelpe pe thane. Palo lesko ritualiteti, sah o kotorleutne ano Parno Kher ka kedenmpe thay ka halolpe yekh maro ano amalipe shunipa: Kur-ani, Ilahie, Dersi kotar o penjarde profesorya thay Dineske manusha kotar korkoro o Turykune Reprezentya khetane amencar.

Kava manifestipe si yekh bajako vash te irana o phralipe, o romano barikanipe, o kamipe yekhe-yaverea sar angleder thay o kotorleipasko gendosko bayaripe ano manifestipe e Bayrakoske Divesko.

Akava bersh nane te nakhelpe ano Lezya, ayekha informingya vi o Elan Mulamisini - Bayraktari kova vakergya vi e Lezyiya thay lelepe kan.