Palo yekh rodlarin kotar amari organizacia BRO “Durmish Aslano” thay romane intelektualya, o sherune e BRO Roma Yekhipe, puterde akcia vash te keden love vash te phikoinen e viktima mothavipa yekh avrirenduno solidaritetesko misal kedipa 800 euro vash o M.M., kova angleder nesave kurke atakisalo brutalno ano Prizren feriso nasinele 5 euro te del e jenenge kola atakindeole. Palo atako o M.M. sinele vilicako phagipe thay ulo yekh phari operacia.

E kedimi suma transferisali banka ko babo e M.M.-esko, vash te uqharen o medicionalune harjipya thay te phikoinelpe e rikuperipasko procesi pali operacia.

Akava solidaritetesko akti mothavla pandar yekh ver o zoralipe e romane komunitetesko thay e diasporako angashipe vash te oven pashe e qalavde, atakime thay nasvale manushenge vi ayekha kola nakhavena violence yase ushkavipe lenge hakayengo.

Durmish Aslano thay romane aktivistya kerde nays vash sah kontributorya vash o phikoipe thay akana kerena kharipe e institucienge te len mase vash te anglo aqhaven yekhune surya vash o avutnipe.

Vi ayekha, akana ajukerena te aprovingyol e rodlarin vash emergentyuno phikoipe e Prizrenoske Sherunesko, Shaqir Totaj, te phikoinel e viktimaki familia.