Prishtinaki Temeluni Krisalin refuzingya e rodlarin vash siguripe e padiako kova dendilo kotar e grupa “Niyekh centi may buderi”, phando e ZRrE-ska decizia vash pahalipe e elektrikuna energiako vash 16.1 pe shel.

Avokati Ardian Bajraktari, reprezenti e jenengo kola kerde padia, informingya kay akana gatiserdili e rovlarin vash e Apeleski Krisalin, angloinformipa kay o krisyuno Mareva ka lugyargyol.

Mashkaria padia rodingyola anulipe e deciziako vash pahalipe e struyako, kova moldisalo sar mamuykrisyuno kotar o jene kay thovde e padia. Jikay, vi o Populaciako Avokati mangla te pezulingyol akaya decizia ji palo agoripe e rodlaripyengo thay e rovlaringyengo kotar o dizutne, potenciripa kay o pahalipe e tarifengo lelilo ano vahti kana simen institucionaluno quqipe.

O neve tarife yase o pahalipe kova khugya 1.to mayestar ano zoralipe, vazdingya e kilovateski cena vash o kherutne konsumatorya kotar 7.79 ano 9.05 centë vash e uqhi tarfi, thay kotar 3.34 ano 3.88 centë vash e teluni tarifa. Pali akaya decizia, pahalisale buderi bazikune produktya sar o maro thay e kahavea, jikay e biznesyenge reprezentya angloinforminena nevi padia mamuy o ZRrE.