Kotar o trin romane partie kola ano 9.to februareske nacionalune alosaripyende sine ani yekh lista, akana sine korkore ani konkurencia mashkarpeste vash te vijainen e beshavni ano Kosovako Parlamenti.

O preliminarune rezultatya, kote ji akana gendile sah o vote kotar e Kosovake votuipaske thana, thay siyem pashe agoripa vi o vote e diasporake kola si posta, lelola kan kay e Kosovaki Romengi Anglipaski Phiravlin kolako moto sine “Respektin tute, votuin vasnipeya” vijaingya o alosaripya, kote kotar e Kosova sila 1056 vote jikay kotar e diaspora ji akana lele 39 vote, kote ano totali iklona 1095 vote.

Vi o lideri e partiako LPRK, r. Erxhan Galushi iklola yekhe hramipa ano piri socialuni rafin kotar mashkaro postipe informinla kay palo agoripe e genipasko thay e verifikipasko e kutiengo ano votuipaske thanenge centarya ano Kosovaka Republikako teritori, politikuno subyekti LPRK, si vijautne e alosaripyengo kola adikerdile pe 28.to decembro, kote restey 1067 yase 278 vote may buderi se e aver romani partia PREBK.

“Akava rezultati si klarifikimo argumenti e dizutnenge pakyavipasko thay e biqhinda bukyako ano tereni. Akale suroa, naysikerava vilestar sakole aktiviste, kola niyekh ver na aqhile kontribuipa fokusea, mangipa thay godornipa.”, si o hramipe ulavdo ano socialuni rafin.