Aktualune Nevipya
O terne kotar e Jakovaki Komuna vizitena e Romani Biblioteka
- 29/05/2025
- By Romano Avazo
Share
Marte Dive, volenteri David Chmielewski kotar o Fullbright ETA kotar Amerika vash sikavipe e Anglikana Qhibyake Kursesko, kova kerla buti ani Jakovaki Komuna e ternencar thay Jakovake Universiteteske "Fehmi Agani" studentyencar realizinde yekh vizita ani Yekhuni Romani Biblioteka, koya arakhlola ano ofisi e may purana romana organizaciako "Durmish Aslano".
E sikavni e Romana Qhibyake Fakultativune Siklipeski thay e Kreatora e Romana Bibliotekaki, vi ayekha publicista e pustikyengi ki romani qhib, ry. Urma Menekshe, ajukergya thay dengya informacie pederal e Biblioteka, o romane pustika thay e romane siklipasko evolviripe ano Prizren, janipea kay ni yekh aver Kosovaki Komuna na adikerla akava siklipe akreditimo kotar e Ministria vash o Siklipe, Skencia, Teknologia thay Inovacia.
"Adive ani amari Romani Minibiblioteka “Romane Pustika" ,sinemen loshalipe te ajukera yekh vizita kotar yekh grupa e Jakovake Studentyencar kotar Universiteti “Fehmia Agani”. Vizita organizingya o r.David Chmielewski, kotar Fulbright ETA e selia ani Gjakova palo phikodeipe e Prorektorako, ry. Nazlie Tyfekci, vash Mashkarthemutno Khetanobutikeripe kotar e Jakovako Universiteti." phenla e rayni Menekshe ani piri ofisialuni socialuni rafin.
Desar akalestar, e kreatora e Romana Bibliotekaki mothagya e kreiripaski historia thay o mahatnipe kay sila akaya minibiblioteka thay lakiri bari rola koya prommovinla e qhib thay e romani literatura. \
"Siyem bahtale, kay dikha o baro interesipe kotar o terne vash o romani kultura, qhib thay historia. Nays vash e vizita thay phakya kay ka irangyoven palem may sig!", sine o agurune alava e rayna Urma Menekshake.
