Prizreno, sar yekh multietnikuni diz, kote vakergyona buderi qhibya, vi kote yekh e may popularne qhibyendar si e turkyuni qhib, akana si te ovel nikoqiri e Mashkarselikane Teatroske Festivaleski pe Turkyuni Qhib kova ka realizingyol mashkaro date 10 ji pe 14 septembri 2025.
Akava 5 disuno festivali, organizingyola kotar o Art Theater thay Instituti Yunus Emre, kote ka anel ani diz artistya kotar e Kosova, Turkia, Vrtloriguni Makedonia thay Vrtlorigune Qiproski Turkyuni Republika.
O program sile andripe 20 ver-verutne artistikune eventya, 4 teatralune khelipya, yekh teatraluno drabaribe, 2 drame vassh o qhavore, 3 kuklenge teatarya, bukyake atelie, ekspozite thay filmeske proyekcie.
Festivale sile res te promovinel o kustikipe thay e kreativuni energia e turkyune teatroski, keripa khetane o terne generacie thay e penjarde artistyen ano yekh kulturuno thay artistikuno dialogi.
Ani puteripeski ceremonia pe data 10 septembro ano Shadervano ka prezentingyol yekh drama kotar o qhavore thay o terne, jikay napal ka phiravgyol e premiera e dramaki “Nevbahar” kotar e Uskupesko Nacionaluno Turkyuno Teatro ano Kulturako Kher “Jemayli Berisha” ano Prizren.
O organizatorya kharena sa e jenen kola kamena o arti te len kotor ano akava mahatno kulturuno manifestipe kova ka zorakerel o mashkarkulturune thay artistikune phandipya ano rayoni.
