Temeluni Prokuroria ani Mitrovica kerdi rodlarin vash alosaripe e anglobrandipaska masako mamuy 10 sherunenge e Komunalune Genipaske Centrengi, kotar o 34 sherune kola astardile vash bipakyavipe vash falsifikipe e rezultatyengo e alosaripaske procesesko e 28.to decembareske 2025.

Akava informipe dendilo kotar o avazdeutno e Mitrovicake Temeluna Prokuroriako, Valon Preteni, kova phengya kay 34 persoyna adikerdile vash 48 orya.

E krisalin ajukergyla te decizinel vash e siguriaki masa mamuy akala kola astardile ano avutne seance.

Mashkaro Kosovaki Republikako Penaluno Kodi, e votako yase e alosaripyenge rezultatesko manipulipe si penaluno akti thay brandingyovea zimdana ji pe 5 bersha.