Erati cidisalo o shorti e partienge gendyengo vash o lokalune alosaripya kola ka adikergyon pe data 12 oktombri 2025 ani sah Kosova, thay e Yekhipaski Romani Partia ani Kosova cidingya o gendo 156 ano voutipasko lil.
Ani ceremonia koya organizasali kotar e Kosovaki Alosaripeski Komisia lele kotor o talosheruno e partiako, r. Muhamedali Merxhollar thay e ry. Hurisha Krasniqi, kola palo cidipe e shortesko yekhatar ulavde ani piri socialuni rafin vash te informinen e komunitete vash o gendo 156 kova si te sheruningyol kotar o r. Blerim Avdo ani Prizrenoski Komuna, vash mangipe e votengo vash yekh romano asambleisti.
“Romano Komuniteti ano Prizreno sile shaipe vash reprezentipe ano Komunaluno Sombeshipe, vash yekh direktivuno thay zoralo avazo ani lokaluni politika. Akava si o shaipe kay o mangipya thay interesya e romane komuniteteske te tretiringyon prioritetea, thay te ovel olen o manglo suporti.
Ani akaya mahatno perioda, aktivuno kotorleipe e romne komunitetesko sitov bazikuno, vash siguripe yekhe zoralo reprezentipasko thay vash leipe e decisiengo kola silen direktivuno impakto ano lengoro jivdipea.
Votuipe si yekh hakay thay obligacia, sakova avazo si mahatno vash kontribuipe ano avipe kote savore shunena peste yekhune.”, si o hramipe ulavdo ano ofisialuni rafin e reprezentyengi e akala partiaki.
