Talosheruno e Prizrenoska Komunako, r. Kujtim Gashi, adive ajukergya ko poro ofisi ano Parno Kher, e duy romane reprezentyen kotar e Ad Hoc Rafin vash o puqipe e romana qhibyake deciziako, e r. Osman Osmani thay Fatmir Menekshe.

E tema e arakhipeski sine thovipe e rodlarinako vash te yaveringyol/laqhargyol e Regulativa vash e Qhibyengo Vastipe ani Prizrenoski Komuna koya si te aqhol sar komunaluno dokumenti koya ka lokharel e romana qhibyako vastipe ano institucie thay yekhe dromeya ka del efektiviteti vi e deciziake kay e romani qhib penjardili sar qhib ano ofisialuno vastipe ano 31.to oktombri 2022, ano prago e romana qhibyake mashkarselikane divesko, 5.to novembri.

Desar akale arakhipestar, ano nakhlo kurko, pe data 2.to februari – paraskini dive, upreleparne reprezentya arakhlepe vi e Prizrenoska Kupatnaka Sheruna, e ry. Antigona Berisha Bytyqi, kote vi olake elaborinde o mahatnipe e akale dokumentesko kova na saday ka lokharel e instituciengi buti numay ka ovelole impakti vi ano telaripe e diskriminaciako mamuy e romani qhib thay romano komuniteti.

Akava avokipe realizngyola ano rami e proyektesko “Promovipe e diversitetesko thay e romana qhibyako ani Prizrenoski Komuna thay gojaveripaski kampanya e diskriminaciake maripesko” imlementirimo kotar o romane organizacie, sar: Nevo Koncepti, Durmish Aslano thay ROMTEGRA thay phikodendo kotar e Voice of Roma, Ashakali and Egyptians.

@radioromanoavazo