Savatonaki rat, pe 9.to augusti 2025, pe ora 19:00 ano Prizrenosko Phandipasko Kher (Lidhja e Prizrenit) promovisali e pustik: Sine kay sine yekh “Kujtim Paçaku” – tragedia e pativale dramaturgeski, Nexhip Menekshe.
Akaya drama publikisali mashkaro phikoipe e Ministriako vash e Kultura, Terne thay Sporti kotar e ry. Urma Menekshe – sikavni e Romana Qhibyake Fakultativune Siklipeski thay Kreatora e Romana Bibliotekaki, koya sakova dive barvakarela e romani litura prekal pere publikipya kola garavena e literaturako/livaripesko kustikipe.
O puteripe e promovipasko startingya mashkaro mekhipe e avazyengo e rahtmetliengo Nexhip Menekshe – yekh fraza ani drama thay e rahmetliako Kujtim Pacaku – o historikuno vakeripe ani Kosovako Parlamenti. Napal adikerdilo yekh minuti traynipe vash akala duy personalitetya kola yaverinde pi dunyaya. Paneleske kotorleutne sine: Urma Menekshe – publicista, Fatmir Menekshe – recenzenti, Denur Paçaku – prof. Kujtim Paçakosko qhavo thay Kaltrim Balaj – rejisori e akala dramako koya hramisali thay kheldili ano bersh 2019 sar memorialuni drama vash o jivdipe thay e buti e romane kulturake sinonimesko – Kujtim Paçaku.
“Ano Prizrenoski Phandipasko Kher kova si simboli e Prizrenoske Yekhipesko, adikerdili yekh rat koya mothagya vi o Phandipe, Phralipe, Kamipe thay o Amalipe e duy pativale jenengo, Kujtim Pacakosko thay Nexhip Menekshesko.
Ano promovipe lele kotor akanutno deputeti thay sheruno e Partiako PREBK, ex-direktorya e BRO Durmish Aslano, jurnalistya, hramarne, autorya, dramaturgya, aktorya thay aktivistya.
Pustik desar e romana qhibyatar, si adaptimi ani ano aver shtar qhibya: Albanyuni, Anglikani, Srbyuni thay Turkyuni.
