Ministria vash Sastipe dengya pe janipe kay ano totali gendo e aktivune surengo isito 2,640, numay ano penjaripe vash medie phando e neva masa antiCovid-19 kota Oda vash Turizmo thay Hoteleria dive pe angle dende pe janipe kay decisiya ajukergyola te lelpe adive,11 avgusto.

Kosovako Raipe adive dengya pe janipe kay ka adikergyol renduno kedipe pe ora 10:00 numay na mothavde divuno rendo.

Ministri vash Sastipe, Arben Vitia dive pe angleder angloinformingya masa vash dizune kola na lele vakcina antiCovid-19.
“Nay mekha kay dizune kola na siton vakcinime, sebepi neglizhencako te ovelolen tromalipe yekhuno odolenca kola isiton vakcinime, vakergya Vitia”