Aratike adikerdili yekh avrirenduni Seanca ano Kosovako Parlamenti, kote manglilo te votuingyon konstituciake amandamentya propozime kotar e presidenta Vjosa Osmani kola anglodikhlarna kay e Kosovako presidenti te alosargyol direkt kotar o dizutne e na kotar e kupatni. Numay akala amandamentya na giriqinde ani Kupatni.

Ani seanca sine 93 deputetya kotar o 120 deputetya inkludipa e 9 deputeten kotar o haricune komunitetya, jikay e Serbiaki Lista pere 9 deputetyencar na lele kotor thay kerde nashayutno o siguripe e mangle votenge gendosko.

Ano kedipe sine buderi debatya. Sheruno e PDK-esko Bedri Hamza phengya kay ov ajukergya te alosargyol o nevo presidenti. Abdixhiku phikoingya o amandamentya numay phengya kay e Konstitucia nashti yaveringyola ratyako feriso nane bereketi.

PDK-eske deputeti Perparim Gruda, sinele debatya e Parlamenteska sheruna Albulena Haxhiu, feriso mashkaro akava kedipe ushkavdili e Parlamenteski Regulativa. Jikay leski kolega Ganimete Musliu – akuzingya e Kurte kay mangela te kerel totalitaruno sistemi.

Fatmire Kollcaku propozisali sar o duyto kandidata vash e Kosovaki presidenta kotar e LVV.

Pe agor e Albulena Haxhiu sar sheruni e parlamenteski, direktisale e Kosovaka Konstituciaka Kriselinake vash moldipe e konstitucionalipasko e presidenteske alosaripaske procedurako.

Palo agoripe e seancako e deputeta Arbierie Nagavci phenla kay e opozicia kerela nashutno e presidentesko alosaripe mangipa te ningaren o than ano alosaripya.