Ano nakhlo kurke, e data 9 ji pe 12.to oktombri 2025 ani Germaniaki sheruni diz, Berlin adikerdilo e romane filmyengo festivali “Ake Dikhea?”
Benjamin Menekshe – romano yekhuno filmyengo rejisori akhardilo thay lela kotor promovipa poro agoruno dokumentaruno filmi “Horo ano Boro” kote mothavla o romana kulturake moldipya thay e bershenge sfide vash te ovelolen yekh Kultuako Kher vay Centro, yekh historia may buderi se kvashe shlbrsheski.
Desar kay ov promovingya poro filmi thay e Prizrenoski Kultura thay e Durmish Aslano-sko biqhindo aktivizmo vash garavipe thay promovipe e romana kulturako mothavdilo vi ano Berlin e Germaniako, o terno rejisori Menekshe triumfingya e poqin “May laqhi fotografia”.
“Ilestar nays kerava e festivaleske “Ake Dikhea?” thay e artistikuno direktoreske, r. Hamze Bytyqi vash akaya poqin. Si yekh baro barikanipe kay reprezentinava e Kosova thay e romane komunitete ano Berlin. Yekhedromea nays kerava vi e Kulturaka Ministriake vash o phikoipe kay amaro avazo te shungyon ano akala mashkarselikane skene.”
Mashkaro Benjamin Menekshe o filmi Horo ano Boro nane saday yekh filmi – numay yekh mesashi vash yekh elpin vash o terne generacia thay yekh kulturaki memoria koya meritinla poro ambienti.
“Ini soske ani Kosova amen nanemen yekh salla dedikimi vash o roma, amen lugyara te kreirina, te dikha suno thay te pakya.”, phenla o rayo Menekshe.
Benjamin Menekshe e premiera e filmeski koya sinele pe 29.to aprili ano Kino Lumbardhi, ulavla poro naysipe vi vash sah odola manusha kola kontribuinde vash akava dokumentari, ulavipa pere experience, nostalgie thay puteripa poro ilo vash e romanipasko drom, bizo kolende akava filmi na ovla sine.
“Akaya poqin si olengi – thay sakole terneski kova sile tromipe te mothavel piri historia.”, phenla e filmesko rejisori Benjamin Menekshe
