Ani akademia e 8.to aprileski sine ververutne intelekutya thay penjarde figure yekh olendar sine vi o r.Hysni Qylangji kote pere lafipa thay janipa barbakergya o eventi may tele shay te dikhen o lafipe kotar o Hysni Qylangji.
Raynalen thay Rayalen,
Laćho dive, thay shukar siyen ale!
Ani akaja Solemyuni Akademiya, kova adikargyola ano Prizrenosko Komunako Kher, mashkarselikano dive – 8-to Aprili – Sima pativ te bahtakarav Sherutne ra!i Shaqir Totay, pere stafeya, thay ra!i Fatmir Menekshe, kova organizirinen akava solemyuno aktiviteti.
Vi tumen, kola siyen ani akaja Solemyuni Akademiya, tana bistara niyekh ver amare vasne manushen kola dendey poro kontributi ano Kulturako Artistikano Amalipe “Durmish Aslano”.
Intelektualo Iniciyatori vash te putargyol Kulturako Artistikano Amalipe “Durmish Aslano” sine o prof. Albanikana Qhibyako Nysret Seharsoyi, kova kergya buti vash emancipacia thay afirmacia, ov sumbyargya o darinya romane amalipesko.
Salaydin Shalyani, manush kova mothagya fokloruno terzimahalake khelipya ani skena juvlane horra – koreografikuni folklori – kova ov mothagya, panda khelena amare qhaja thay qhave “Ah be Devla so kergyan”, thay ponj tarabuke.
Prof. Ibrahim Elshani, pedagogo – angluni ver hramingya bilteni “Romano Alav” gendo 1 ko bersh 1972 – riqhibyargya but pustikya. Palo marebe, ko bersh 2003, angluni ver redaktori romani qhibyako ano “Yeni Donem”, redaktori ano radio Prizren, TV redaktori romani qhibyako “Yekhipe” ano nacionaluni televizija RTK, dhe magazina pe romani-albanyuni qhib “Yekhipe”.
Yuristi Shaban Berisha – dengya poro anglashipe kova savaht sine amenca kana sinamen kriseske puqipya ano Kulturako Artistikano Amalipe “Durmish Aslano”.
Prof. Kujtim Pacaku – poeti, aktori, romologi, shurnalisti, deputeti – hramingya romani poezije, hramingya “LAVUSTIKORRI” ano shov qhibya thay but aver hramipipaske ediciye. Redaktori ano radio “Yeni Donem” dhe formiringya okteti e purane gilenca kola gilavdiley angleder 200-vay 300 bersha.
Prof. Nexhip Menekshe – pinjardo aktivisti, dramaturgi, hramingya drame pe romani qhib. Kergya buti sar jurnalisti ano lokaluno radio “Yeni Donem” dhe radio pe romani qhib “Yekhipe” ano radio Prizreno. Thaj sikavno e romana qhibyak. Ko bersh 2007, shrdela te transmetuingyol lokaluno radio pe romani qhib Radio “Romano Avazo”, kova vi adisutne diveste kerela buti 24/7 orya ano kurko.
Bahtalo Mashkarselikano Dive e Romengo – 8-to Aprili.
Poezia: AMARI ALFABETA
Aśunen, Rromalen.
But laćo akava nevipe,
Cirdel amen i amari alfabeta.
Ćaće te halova jekhàveres,
Ćhava!len, Ćhaja!len, pe sa o sundal.
Daj si amenqe i qhib rromani,
E rromen oj parvarda but śelberśa.
Filatin si laqe, khetani alfabeta,
Gudle sar laθe akala patrana.
Hurǎl akana amari Ćhib,
Xasardilo o tamlipen e ratǎqo.
I dùma rromani sastili,
Javin dudvali laqe disjali.
Kuna si akaja alfabeta,
Kher si oj amara qhibǎqe.
Lake patrana si sumnakaj,
Mirikle amare gilenqi.
Nane vaver Ćorroni amenqe,
O po baro barvalipe i Ćhib isi.
Pativ si amenqe te lekhas la,
Pherdo amaro ilo, ovel plain.
Rundam but berśa e jaśinaθar,
Rromalen dikhas anglal akana.
Sar so o avera vi amen avdives,
Śaj i Ćhib amari te lekhas.
Tati bokoli si i dùma rromani,
Thaj laqi muzika lośrel amen.
Urǎvas la akla patranençar,
Zabades nane, phrala!len.
Źalune Ćaće sùrte sinam,
Ʒanipen sùrte kamas.
I alfabeta amari ka siklovas.
