Akana e kosova sila Kupatni thay nevo Raipe, feriso erati, tetrade dive, pe 11.to februari 2026 resla te konstituinel e Kupatni thay e Kurti 3 Raipasko formiripe.
E Kosovake deputetya erati dende po alav jikay yekhe dromeya vi alosaridili e sheruni e Kupatnaki thay o talosherune.
Albulena Haxhiu votuisale kotar 66 deputeya, jikay 44 sine mamuy thay 8 abstenime.
Yekhatar vi palo votuipe e talosherunengo kola alosardile sar pako, e 104 votencar vash, 3 deputetendar mamuy thay 6 abstenipya, o talosherune alosardile Ardian Gola kotar VV, Vloca Citaku kotar PDK, Kujtim Shala kotar LDK, Slavko Simiq kotar Lista Serbska thay Emilija Redzepi kotar o haricune komunitetya.
Yekhatar palo konstituipe, e thaneski presidenta, Vjosa Osmani, mandatingya e Albin Kurte vash formiripe e Kosovake Raipasko.
Ayekha kay vi o Albin Kurti ano poro lafipe palo leparipe e krisipaske procesea ani Haga, deipa kritike vash e krisalinake pretendipya vash o sherune e UCK-eske, mothavipa kay odola krimya ule kotar o Milosheviqi thay dokumentisali thay penjardile kotar sah o mashkarselikane rashtre.
Palo akava ov dengya nesave alava kote ka bayarel o minimaluno qhonesko pokipe, e qhavorenge pherune pare thay o penzie.
Lesko raipasko kabineti votuisalo 66 votencar vash thay 49 votencar mamuy thay niyekh abstenipe.
Raipasko kabineti sherunipa kotar o Kurti ka ovelole 19 ministrie.
Yekhto talosherunoministri thay Ministri e Avrune Bukyengo – Glauk Konjuvca, e duyto talosherunoministra thay Hakayipaski Ministra – Donika Gervala, talosherunoministri vash o haricune komunitetya thay khetanobutikerpe – Fikrim Damka.
Financiengo Ministri – Hekuran Murati, Ministri vash e Buti, Familia thay e Mestipaske Marevake Moldipya – Andin Hoti, Garavipasko Ministri – Ejup Maqedonci, Andrune Bukyengo Ministri – Xhelal Svecla, Publikuna Adminastratako thay Digitalizmosko Ministri – Lulezon Jagxhiu, Sastipasko Ministri – Arben Vitia; Siklipesko thay Skenciako Ministri – Hajrulah Ceku, Kulturaki thay Turizmoski Ministra – Saranda Bukujevci, Sporteski thay Ternengo Ministri – Blerim Gashi, Lokalune Guvernipasko Administaciako Ministri – Elbert Krasniqi, Ambienteski thay Planifikaciaki Ministra – Fitore Pacoli, Agrokulturaki, Vesheski thay Ruralune Avansipako Ministri – Armen Muja, Infrastrukturako thay Transportesko Ministri – Dimal Basha, Tregosko, Industriako thay Evropianyune Integripaski Ministra – Mimoza Kusari Lila, Ekonomiaki Ministra – Artane Rizvanoli, Komunitetyengo thay Iranipasko Ministri – Nenad Rashiq thay Rayonalune Avansipasko Ministri – Rasim Demiri.
