Erxhan Galushi, romengo deputeti ano Kosovako Parlamenti adikerla o yekhto kedipe sar sheurno e Komisiako vash e Kultura, Turizmo thay Sporti.
Deputeti kotar e LPRK partia, angleder nesave dive informingya mashkari piri ofisialuni platforma kay pativalipa thay godornipa ano lesko duyto mandati ano Kosovaka Republikaki Kupatni, alosardilo sar sheruno e Komisiako vash e Kultura, Sporti thay Turizmo, sar reprezenti e Multietnikuna Parlamentaruna Grupaki.
Thay pe 18.to februari adikerdilo o yekhto kedipe, kote dikhlilo thay votuisalo o Proyektkrisi vash bujetarune ulavipya vash e Kosovaka Republikako Bujeti vash o bersh 2026, vash o umala kola si tali komisiaki kompetencia.
Desar akalestar on diskutinde vi vash e Komisiake akciengiumal, koya ka miratingyol ano avutno beshipe.
“Truyalimo kotar e umalake profesionisyenge kotorleutne, ka kera buti fokusea thay khetanebutikeripe vash te sigurina yekh seriozuno thay efektivuno tretmani ano kulturake, turizmoske thay sporteske puqipya.”, sine agorune alava e romane deputeteske, r. Galushi.
