Palo shlbersha, o yekhto ver ani Terzimahalake romengi historia, e BRO Durmish Aslano koya fanatizmoa garavela piri misia pashe 60 bersha: garavipe e romana kulturako thay tradiciako, resla te organizinel yekh lekanipe e Turkiaka Ambasada ani Kosova, vash te keren yekh ekspedita ani Turkia.
Akaya ekspedita avela sar rezultati e shukar halovipasko mashkaro nesave profesorya ani Turkologiaki Katedra ano Prishtina Universiteti, respektivitetea o profesori Fatih Kemik, kola eskplorinena e pishuni kultura ani Kosova, thay kolen angyem te dikhen amari Bayrakoske Diveski – Hedenebiri unikuni tradicia.
Lengo interesipe ulo sakova dive may baro, jikay desar e profesoryendar, biraipkane organizaciendar, jurnalistyendar, institutyendar thay aver turkyune etnitetyendar, o interesipe resto na saday ani Turkyuni Ambasada ani Kosova numay vi ani bari Turkia, kote vi ano Konyako Universiteti thay ko profesori Ahmet Taşgın kova akava bersh korkoro sine prezenti ano manifestipe e Bayrakoske Divesko.
Akana taysa, 20.to septembroa yekh grupa e romengi: Bayrkataryengi Familiake jene pe qekat e bayraktarea Elan Mulamisini, amaro organizacioake kotorleutne sar medialuna ekipa, folkloreske duy terne thay duy muzikantya pe qekat e direktorea Fatmir Menekshe, nesave reprezentya kotar o politikuno subyekti PREBK thay romane rodlarne thay aktivista vash i kultura thay historia si te dromirina 6 dive ano Turkiake diza sar: Istambul, Eskisehir, Konya thay Bursa.
Ajukeripa kay akava phiripe te zorakerel amaro ledeipe e Turkiaka Ambasada thay Turkiake Etnitetyencar ani Kosova vash te arakha so may pashuno qhaqhipe phando e Bayrakoa thay amare kontributea sar roma vash korkori e Turkia andar o phrahale shlbersha ji po milebersh.
