O Kosovako Kriselinyako Konsili publikingya o nevipe kay licencingya e Avdi Misini vash kriselinyako riqhibyarno pe Romani qhib. Angluni ver ani Kosova, ano yuridikuni qhand shay te phengyol vi ani Lumia, akanatar si licencimo kriselinyako riqhibyarno pe Romani qhib.

Avdi Misini sito butbershuno aktivisti, riqhibyarno, hramarno thay zhurnalisti thay ov nakhavgya sukseseya o konkursi vash riqhibyarno e Romana qhibyako puterdo kotar Kosovako Krislinyako Konsili. Akava durma mangipe e romane komunitetesko kote angluni ver praktikisalo riqhibyaripe (translacia) pe romani qhib ani Kriselin pe 2008 bersh, khuvgya pe zoralipe palo ofisialune mangipya kay kerdile angluni ver kotar o romano komuniteti pe 2014 bersh thay palo odova pe 2022 thay 2024 bersh. O mangipe e komunitetesko lelilo may seriozune palo penjaripe e romana qhibyako ani Prizrenoski komuna thay palo vastipe e translaciako pe romani qhib ani yekh kriselinyaki sura yekha romana familiako ani Prizrenoski Kriselin phiravdi kotar o avokatya Blend thay Gent Gjini.

Licencipe e Avdi Misinesko sar kriselinyako riqhibyarno kerla may barvalo e romane komunitete ano vastipe e qhibyake thay manushikane hakayengo ani Kosova thay may buhle. Kosovake roma savaht sine misal vash hramipe e pozitivune historikune ovipyengo thay akalea o romano komuniteti ka ovelole may but lokhipya ano kriselinyake procesya vastindoy piri Romani qhib.

Radio Romano Avazo Gynesh Veshall