Savatone dive pe 21.to decembro 2024, adikerdilo treningo vash o terne e Gjakovake Komunake, ano rami e proyektesko “Vazdipe e Medialune godyaveripesko vash o terne e komunitetyenge roma, ashkalie thay egiptasya ani Kosova”, kova realizingyola kotar “Durmish Aslano”/ Radio Romano Avazo ano partneriteti e Kosovake jurnalistyengi asociacia thay phikoingyola kotar e US Embassy ani Prishtina.

Proyekti sile per res medialuno edukipe thay vazdipe kritikuno gendipe vash 15 komune, zoralipeya ternen vash te penjaren thay te sfidinen dezinformacie.

Kotor leyutne sar penjardo jeno Emrah Cermijani kotar e Gjakova potenciringya kay akala si but mangle aktivitetya vash o terne vash o sebepi e bayaripako kapaciteyenge vash o terne.

Ji kay vi e r.Mergita Hoti aktivista kotar Gjakovaki komuna potenciringya kay ” Lelam but informacie phande jurnalistika kote na sinem shunde ni yekh ver thay akava si amenge but shukar sar terne jurnalistya, pakyava kay si te phiravgyon o treningya thay aktivitetya ani jurnalistikaki krang”

Ano treningo sine vi terne studentya, thay o studenti Aliriza Sefa phengya kay ” Akaya si angluni ver kay me lava kotor ano treningya thay penjardilum but informaciencar.

Kotar o kotor leyutne diklola kay ano Kosovake Komune si mangipe kotar o terne vash siklipe ani jurnalistikaki krang.

Kava programi sile pe res sensibilipasko vash medilauno edukipe, azhutipe vash te identifikipe thay maripe hohavne nevipyenge, numay involvrinla jivdikuno diskursi ano ververutne komune. Liderya e komuniteteske thay terne si te angazhingyon vash mahtnipe e zhurnalistikako ano formipe e yek informativuno amalipasko.