Pe 24.to mayi ani may purani Romani Mahala, Terzimahala, akharde e romane albanalogeske anavea, Nusret Seharsoj, palo 2 bersha iklola o Bayrako kova pretendigyola te ovel purano kobar korkori e mahala yase kobar e romengo avipe ano Prizren.
Janipea kay o Bayrakosko dive akhardo Hedernebiri, na festuisalo 2 bersha, ano akava bersh ano lekanipe e Bayraktaryengi Familia, Mulamisini thay o romane kulturake, humaniteteske aktivistya vi Romana Partiake reprezentya (PREBK), akordisale vash bayrakosko khetanyuno manifestipasko organizipe.
Lekanipe reslilo palo Bayraktaryenga Familiake reprezentyengo akseptipe e cidipasko nesave adetyengo kova kotar o mahalake jene ji akana gendile sar shirki, sar sine o nerzi, kurbaynego qhinipe thay bayrakosko qumipe, vi ayekha goqyengo bashalipe. Numay, ini soske e familia akseptingya akava, palem but hari mahalake beshutne lele kotor ano Manifestipe.
Numay, akaya ver, akava manifestipe sine e may popularne ovipyendar, feriso o romane aktivistya, reste kay ani akaya reformacia e Hedenebireski te len kotor reprezentya kotar e Turkiaki Ambasada ani Kosova thay sah o organizacie yase institutya kola siton Turkiake orgayna kola kerna buti vash te garaven e kultura thay o dini ani Kosova.
Yekhto ver ani Historia, mashkaro kulturako sinonimi Fatmir Menekshe, akhardile thay lele kotor uqhe manusha kotar o ver-verune Turkyune Institucie ani Kosova, sar: Ambasadake reprezentya sar o Dinesko, Siklipasko thay Kulturako Goditetne kotar e Turkyuni Ambasada e selia ani Prishtina, Turkologiake Profesorya e Prishtinake Universitetestar “Hasan Prishtina”, Kosovake Yunus Emreske Institutesko Kordinatori, Maarif Vakfesko Kordinatori, Kotorleutno e Administratoryenge Bordesko ano IHH – Insani Yardim Vakfi Kosova, UKID Kosovako reprezenti thay Turkyune KFOR-eske reprezentya kotar e Sultan Murati Kislasi.
Desar akalestar sine Sinan Pashasko Hoca, Hocalarya thay Reprezentya kotar e Emin Pasaski Jamia, Raif Virmica – hramarno, jurnalisti thay rodlarno kotar o Prizren.
Yekh eskluzivno misafiri sinamen kotar e Konya, Turkia, kova sitov o Prof. Dr. Ahmet Tasgin, kotar Haci Bayram Veli Universiteti, kova alo ekstra vash o Hedenebiri thay kova mothagya e historia thay akale bayrakosko mahatnipe.
Ini soske brshin, o Bayrako iklisto pe ora 16:00, thay sah akala upre leparne manusha sar misafirya, e Bayraktaryenga Familiake kotorleutne, thay sah o romane aktivistya, vi ayekha o deputeti Albert Kinoli thay o talosheruno e partiako Muhamed Ali Merxha, lele kotor ano bayrakosko iklipe mashkaro Tekbirya thay Salavatya.
Palo bayrakoski tradicia, pe yekhto ver adikerdilo yekh Konferancia sar yekh Simpozyumi ano Terzimahalako Kedipyengo Kher, kote o yekhto alav sinola e phuri, Shirina Mulamisini koya naysikergya sah e misafiren, napal vakerdilo vash akale divesko historikuno thay kulturuno semnipe. Gilavdilo Ayetul Kursi kotar o Sinan Pashasko Hoca, thay yekh leksia kotar o Prof. Dr. Ahmet Tasgin.
Vash e Bayrakosko Dive – Hedenebiri, desar e Bayraktaryengi Familiatar – sah o phrala pheyna, baro kontributi dendilo vi kotar o Haxhi Sebajdin Avdo thay o aktivisti Daut Qulangjiu.
