Direktori e BRO Romengo, Ashkaliengo thay Egiptasyengo Avazo, r. Isak Skenderi, ani piri x oficialuni rafin, ulavla yekh hramipe vash 1.to Yuni – Qhavorengo Mashkarselikano Dive.

Prekal poro hramipe, rayo Skenderi mothavla kay ov nane kerdoy ni yekh postipe pe 1.to Yuni, na kay bisterdo numay nashti ulo kotor e bahtalipyenge koresko bi adresimo yekh dukhavno qhaqhipe.

“Ano akava dive, amen manglape te festuina e qhavoren. Numay kobar qhaqhipa investina ano lengoro avutnipe thay shukaripe?”, sine yekh retorikuno puqipe kotar o r. Skenderi.

Desar akalestar lekso godinipe si kay lugyargyola te kergyoy yekh biavazosko krimi vash o avutne generacie, mekhinindo o bikontrolake kreiripya, bi klarifikime thay bi implementime politike, kola phikoingyona kotar o krisi implementipaske institucie thay ispektoriatya, potenciripa kay o obyktyengo bikontrolako vazdipe vazdela o gazya, akustikune bunishte thay ruminla o naturako ekosistemi.

“Amare diza bayrona bi shukaruno urbanistikuno planifikipe, e may hari publikune ambientyencar vash o qhavore. O lenya si melale. O vazduh si zehrlia. O vesha nashavgyona. Kava mi si o avutnipe kova manga te kreirina vash olenge?”, si o aver kotor kova citina kotar e rayo Isak Skenderesko postipe.