Romani Humanitaruni Biraipakani Organizacia “Romano Yekhipe” ani festa e Kurban Bayramoski, sar sakove bersh palem sineton aktivno ano ulavipe e masengo vash o qorole familie.

“Romano Yekhipe” pashe yekh qhon gatisernape vash o humanitaruno aktivizmo vash festuipe e Kurban Bayramosko, mothavipa poro gatiseripe kay o romane familie kotar e diaspora te qhinen kurbayna thay te ulaven o mas vash o qorole familie ano Prizren.

O duyto dive e Kurban Bayramosko, ani Terzimahalla (“Nusret Seharsoj”), ani lengi selia ano Kedipyengo Kher, sinelen e ceremonia e Kurbanyenge qhinipaski, kote qhindile 3 gurumna thay 14 koqya (brake) thay e masenge ulavipe ano romane mahale sar: Terzimahala, Tuzusi, Durmish Aslano thay Nevo Jivdipe (Dushanova).

Mashkaro lengo aktivizmo ulavdilo may buderi se mile kilogramya mas vash may buderi se 500 familie.

Desar akalestar, ano yekhto dive e Kurban Bayramosko, e Behar Mark Hejneman – romani aktivista ulagya 100 qhavorenge paketya thay o Zait Qulanji pere qhavea e Elvedinea thay para terna e Xheneta, ulavde 5 tepsie baklave, kote ani Terzimahala uli yekh laqhi festivuni atmosfera vash o Kurban Bayramo.