Prizren, 9.to yuni 2025 – Angleder yekh kurko ovela yekh pharo thay dukhavno ovipe ani Prizrenoski diz, kote yekh romane komuniteteske kotorleutn atakinena brutalno ano teharinake orya , jeno kova muqinlape saday te sigurinel marosko love vash piri familia.

Pashe e ora 6:00 teharin, e viktima ajukarelay autobusi pashe Prizrenoske Universiteteske “Ukshin Hoti” vash te nakhel ki piri buti kote kerla ano yekh depo ko “Liri”. Ov, yekh mirno qhavo thay pativalo, jivdinla ano phare ekonomikune kondicie – bizo day thay yekhe dadea nasvalo, muqinlape kay sakova dive te adikerel para familia para pativala bukya.

Ano odova momenti, duy terne motoryencar pashona pashe leste thay rodindey lestar pare. Kana e viktima nasinele pare vash te del olenge, yekh olendar khuvlole tepna ana moste, phagika leski vilica ani yekh dararni forma. Akava brutaluno atako si yekh shuzho diskriminipasko akti thay violencako mamuy yekh rom kova mamuyingyola phare jivdipaske problemyencar.

Viktima M.M. biqhaldiloy ano Prizrenosko Hospitali, kote vi tretiringyola dikhatea. Adive ajukergyola te ovel operacia vash te laqhargyol leske moski vilica, jikay e familia thay o komuniteti ajukerna anksiozitetea lesko saslaripe.

Autoritetya reaguime sig, arakhle o kamerake video kotar o than kote vi identifikinde e godornen vash akava pharo violencako akti. On akana arakhlile thay ajukergyola te mamuyingyon hakayipa vash pere violencake aktya.

Akava dararno ovipe qhivla ano dudi o bare sfide e romane komuniteteske kola pandar si marginalizime ani Kosova, e may buderi o roma, kola mamuyingyona diskriminipa, bihakayipa thay phikoipasko nanipe.

Akale normalune qhaveski historia, koba muqinlape te adikerel jivdi thay ko pre piri familia ano phare kondicie, si yekh kharipe vash gojaveripe thay akcia vash te aqhavgyol e violence thay o diskriminipe mamuy sah odolenge kola jivdinena ano agor thay krayo e amalipasko.