Aktualune Nevipya
Savatonaki rat, pe ora 19:00 promovingyola e tragedia Sine kay sine yekh "Kujtim Paçaku"
- 07/08/2025
- By Romano Avazo
Share
Savatonaki rat, pe 9.to augusti 2025, pe ora 19:00 ano Prizrenosko Phandipasko Kher (Lidhja e Prizrenit) ka ovel o promovipe e pustikako: Sine kay sine yekh "Kujtim Paçaku" - tragetia e pativale dramaturgeski, Nexhip Menekshe.
Akaya drama publikngyola mashkaro phikoipe e Ministriako vash e Kultura, Terne thay Sporti kotar e ry. Urma Menekshe - sikavni e Romana Qhibyake Fakultativune Siklipeski thay Kreatora e Romana Bibliotekaki, koya sakova dive barvakarela e romani litura prekal pere publikipya kola garavena e literaturako/livaripesko kustikipe.
Oy prekal poro facebook, ulagya o kharipe vash sah o romane thay na romane dizutne vash te len kotor ano avruno ambienti e Prizrenoske Phandipeske Kheresko, ka realizingyol o promovipe thay o panelesko diskutipe vash akaya drama. Paneleske kotorleutne si: Urma Menekshe - publicista, Fatmir Menekshe - recenzenti, Denur Paçaku - prof. Kujtim Paçakosko qhavo thay Kaltrim Balaj - rejisori e akala dramako koya hramisali thay kheldili ano bersh 2019 sar memorialuni drama vash o jivdipe thay e buti e romane kulturake sinonimesko - Kujtim Paçaku.
"Ulavede respektea kharahatumen te len kotor ano Publikipesko Bahtakeripe thay Promovipe e komediako “Sine kay sine yekh “Kujtim Pacaku”, kotar o penjarutno romano Autori thay Dramaturgi kova pandar na bistergyola, Nexhip Menekshe. Amen reslam te publikina sar pustik agorutni drama e autoreski Nexhip Menekshe, koya sinola baro interesipe kotar i publika. Sine kay sine yekh “Kujtim Paçaku”, si tema koya tretirinla o fragmentya kotar o Kujtim Paçakoske jivdipe. Ano skenyune khelipya buderi baziringyona o momentya e fragmentyenge oleska intelektualuna bukyake, deipea baro kontriubuti ano amaro amalipe.", hraminla e Urma Menekshe.
Pustik desar e romana qhibyatar, si adaptimi ani ano aver shtar qhibya: Albanyuni, Anglikani, Srbyuni thay Turkyuni.
