Sherunoministri Albin Kurti kergya kharipe vash te alosargyol so may sig e Kosovake presidentesko puqipe, manginindo kotar o politikune liderya thay deputetya te respektinen o politikuno lekanipe mashkar LVV thay LDK vash o kandidati vash Presidenti, janipea kay nesave LDK-eske deputetya mothavde piri pratsav vash akava lekanipe.
Ano yekhto solemyuno kedipe e Raipesko Kurti 4, yekh dive palo votuipe e neve raipaske kabinetesko ani Kupatni, Kurti phengya kay e thaneske institucie akana si funksionalune thay aqhola saday e presidentesko alosaripe.
“Sar sheruno e LVV-esko thay sherunoministri, kerava kharipe e politikune lideryenge, mere kolegyenge e deputetyenge: te alosaren e Presidentesko puqipe, te da amare thaneske e institucia ani akordanca e dizutnenge mangipa”, deklaringya o Kurti.
