Palo buderi na halovipya, lunge thay biaqhavde diskucie, nakhipe pal-pale ano alosaripya, pe agora no agorune minute, reslilo te ovel yekh konsensusi vash yekh anav kova ka ovel Kosovaka Republikako Presidenti, odova anav si Justina Shiroka Pula.

Ano votuipe kova realizisalo ano Kosovako Parlamenti, vash e Shiroka Pu;a votuinde 81 deputetya jikay duy votuipaske lila konsiderisale bizomol, jikay yekh vota dendilo vash e deputeta Eliza Hoxha.

Palo alosaripe e akala poziciako, e nevi presidenta adikergya yekh lafipe anglo deputetya deklaripa kay akseptinela barikanipa thay godornipa akaya pozicia.

“Akseptinava bare barikanipa thay pherde godornipa e Kosovaka Republikake Presidenteski obligacia. Akava mandate nane yekhe manushesko; ov si e dizutnengo, instituciengo thay e rashtrako kolake buderi kustika sakrifikisale”, phengya e Shiroka-Pula.

Desar akalestar oy deklaringya kay ka ovel savorengi presidenta, bi dikhlo o politikuno, etnikuno vay amalipesko yaveripe. Ka kerel buti unitetea, hakayipa, avansipa thay zoralipa amare institucie. Ka garavel e Konsitucia, e Republikako interesi thay e dizutnengo dinyiteti.

Justina Shiroka Pula si ekonomista thay akademika, jikay pe lungipe para karrierako ov phiravdi vi politikune thay institucionalune funksie.

Ano nakhlo bersh 2025, oy alosardili sar sheruni e Skencieka thay Arteska Akademiako ani Kosova, sar o yekhto juvdli kay phiravla akaya institucia koya kreirisali ano bersh 1975.