Sheruni e Prizrenoske Sombeshipeski: O roma, ashkalie thay egiptasya silen bilaqhi kondicia feriso on diskrimingyona
BRO ‘Durmish Aslano’ si lideri thay promotori e romana qhibyako, tradiciengo thay kulturako ano Prizren thay ani Kosovaki Republika. Numay desar akalestar, ‘DA’ mashkaro poro medialuno departamenti: radio “Romano Avazo”, vazdla medialuno diskursi vash o romane problematike sar yekhuno mekanizmo koleya adresingyona thay biqhalgyona buderi rodlaripya pederal o dizutne, biraipkane organizacie, civilyuno amalipe, institucie, politikune subyektya thay medie.
Akava mothavdilo vi ano o yekhto emisia, kote sar misafiri sine e Sheruni e Prizrenoske Sombeshipeski, may uqhi institucia ano lokaluno niveli.
Antigona Berisha Bytyqi sar sheruni e Prizrenoske Sombeshipeski khetane e moderatora Vera Galushi Paqaku tretirinde e tema ‘Diskriminacia thay Racizmo’ koya realizisali ano kuadri e proyektesko akhardo ‘Phaga e diskriminaciako thay e racizmosko barrang’, phikoimo kotar Voice of Roma, Ashkali and Egyptians thay implementimo kotar o partneriteti ‘Durmish Aslano’ thay ’THY’.
Ani emisia ikliste but laqhe mesazhya thay rekomandipya.
Antigona Berisha Bytyqi sar sheruni e Prizrenoske Sombeshipesko gandinela kay si but bilaqho kay ano 21.to sheltobersh te ovel prezentyuno thay vakergyol pandar vash o racizmo thay diskriminipe.
‘O roma, ashkalie thay egiptasya silen bilaqhi kondicia feriso on diskrimingyona ano ver-verutne umala. Amaro amalipe nashti te akseptinen o yaveripya kay silen o komunitetya sar roma, ashkalie thay egiptasya, ini seske divestar pe dive akala komunitetya silen skoluime manusha kola kontribuinnena vash amaro amalipe’
Antigona Berisha Bytyqi – Sheruni e Prizrenoske Sombeshipeski
Ini seske e diskriminaci si evidentno ano amaro amalipe oy na adresingyola. Sar jana vi amen, vi e Prizrenoske Sombeshipeski Sheruni konstatinla kay o komunitetya na silen o tromipe thay o pakyavipe vash te denoncinen e diskrimaniciake surya.
Sar sheruni oy ajukerla kay e Policia, Krisalin thay Obdusmani sar institucie musay te keren piri buti profesionalizmoa kay akala surya te tretiringyona so may shukar.
Oy mothavla nesave droma sar te Phaga e Diskriminaciako thay e Racizmosko barrang:
‘Musay te shrdina kotar e familia thay amalipe vakerinindoy so may but amare qhavorenge vash o komunitetya roma, ashkalie thay egiptasya. Ano skole manglape te potenciringyon thay te mothavgyol so may buderi vash e historia, kultura thay tradicia e komunitetyengi roma, ashkalie thay egiptasya. Ano skole na valani te vakergyol kay ani Kosova jivdinena o albanya, turkya, bosnyakya, goranya thay aver…!, numay te lepargyon vi o roma, ahkalie thay egiptasya.’
Antigona Berisha Bytyqi – Sheruni e Prizrenoske Sombeshipeski
E yekhto jeni e may uqha instituciako sar si Sombeshipe, mothavgya kay pe data 27 yanuari 2022, sar institucia, khetane e asambleistencar, e partiencar ani koalicia thay e opozicia, ani unanimuni qhand, andili deciziya kay o yekhto ver ano Komiteti vash Komunitetya te oven reprezentya kotar so trin komunitetya, feriso ano aver legjislature sine e rotaciaya. Thay akana, o Komiteti vash Komunitetya sar mekanizmo kova akseptinla thay afirminla e dizutnenge interesya sile reprezentya vi kotar o roma, ashkalie thay egiptasya.
Antigona Berisha Bytyqi si yekh sikavni e profesia thay akana alosardili sar o yekhto juvli koya ka ovel ano qekat e may uqha instituciako sar e Priznesko Sombeshipe kotar e PDK partia. Oy mashkari emisia mothavgya kay o Prizreno si e kulturaki kuna, thay vi e romana kulturaki kuna, kote realisale kulturune aktivitetya shrdipeya e bershendar 1970, mashkaro KAA ‘Durmish Aslano’ thay o Romano Teatro ‘Nexhip Menekshe’ si anglune amateryune teatrendar ani Europa.
Agorutne trin may mahatne rekomandipya kotar e Prizrenoski Sombeshipaski Sheruni si:
- Te vazdingyol o organizativuno niveli e politikune subyektyengo kay ano aver alosaripya te oven kotor e Sombeshipasko;
- Te promovingyol so may but e romengi qhib, kultura thay tradicia, komunitetyengi origina, feriso but hari manusha janena kay so trin komunitetya silen yaverune origine.
- Komuniteti manglape te marelpe so may but vash peske. Khetane te mobilizingyova hay te mothavgyol o qhaqhipe e Prizrenosko sar toleranciaki thay khetanejivdipaski diz.
