Radio Romano Avazo realizingya specialuni emisia ano khetano butikeripe e OSBE-eska Misia ani Kosova e tema: 25.to bersh OSBE-ska Misiako ani Kosova kola ji akana kontribuinde ano garavipe e manushikane thay komunitetyenge hakayengo, laqharipe e publikake stabiliteteske standardyengo, koya monitorinla pashe o politikune ovipya thay pasharla pere rekomandipya.

Sasavipea ani emisia vakerdilo vash o romano komuniteti kova aqhilo pandar ani bilaqhi situacia iniseske OSBE phikoingya vi o Strategie vash e romenge involviripasko ano Kosovaruno Amalipe, promovipe e juvlengo socio-ekonomukuno zoralipe, radioynengo thay romane televiziako phikoipe, vi vash o siklovipaske centarya.

“Amen hramina o 25.to bersh e formiripasko e OSBE-eski Misia ani Kosova pali decizia e 305 reprezentyengi ano OSBE-sko Savahtuno Koncili. Pe 1999.to bershesko yuni, formiripastar ji akana e Kosova nakhabgya ano buderi yaveripya thay e Misia sine godorutni vash laqho khetanobutikeripe e partneryencar ani Kosova vash te kreirinel nesave esencialune institucie, specialune biumlavde Institucie sar o Ombdus Personi (Populaciako Avokati), krisalinale intitucie thay medie. Pe shrd, vi o alosaripya direktisale kotar e OSBE-eski Misia.”, phenla o Ambasadori Devenport.

Mashkaro tretirime teme sine Komunitetyenge Hakaya, ano fokusi e romane komunitetesko ani Kosova kote moldisalo lengiri pozicia andar o 25 bersha thay si mi pandar diskriminipe pederal o romano komuniteti. Desar akalestar OSBE-sko ambasadori respodingya vi ano puqipya vash e OSBE-sko phikoipe e komunitetetn, hakyengo respektipe thay implementiripe thay kobar involvirisale o juvla ano lengere phikoipaske planya thay programya.

“Janipea kay e Kosova evolviringya, thay e OSBE-eski Misia andar o bersha tiknili thay yaverisali. Andar akava periodi dendilo baro fokusi e haricune komunitetyenge. OSBE-eski Misia kergya buti ano siguripe e legislaciako mashkaro institucionalune ramya vash te respektinen lengere hakaya. Kosova sinela prioriteti e romen thay o OSBE kergya khetane buti e Civilune Amalipe vash te phikoinel ole nano avanciripe lengere hakayengo.”, respodingya o rayo Devenport.

Ini seske o legislacia ani Kosova si ani akordanca e mashkarselikane standardyencar, e Misiaki rola sit e sigurinel kay avutni legislacia si ani akordanca e mashkarselikane manushikane hakayenge krisyencar. Numay si valanipe vash vigilencia thay biaqhavdo angazhovayne.

Ambasadori mothagya kay dendilo yekh anglunipe vash o aksesi ani siklipe/edukacia vash o romano komuniteti ani Kosova, thay ano butyaripaske shayipya, sheral vash o terne juvla.

“Diskriminimi stukturor penjardilo kotar e raipaski strategia vash o roma ani Kosova koya andar peste akharla vi e Diskriminaciako Raportipaski Platforma.”, sine o respendipe vash e diskrimancia.

Ani emisia vakerdilo vi vash OSBE-esko kontributi vash o medie, lengere kreiripasko ani Kosova, lengere phikoipasko thay tromalipasko, thay o niveli e juvlenge reprezentiripasko ano media.

Sasavipea o Ambasadori Michael Devenport amalimi kotar e OSBE-eski sheruni ano Prizren, ry. Anetta Samotyj, Marieta Akhveldiani – Ofiserka vash o Komunitetya thay o Mentar Karjagdiu – Programesko Uqho Asistenti si o duyto fora vizitnla e romani may purani organizacia Durmish Aslano, o yekhuno romano radio “Romano Avazo” thay e Romani Minibiblioteka thay o ekspozime plakate e romane dramenge kotar o Romano Teatro Nexhip Menekshe.

https://www.facebook.com/radioromanoavazo/videos/466185345931087