O roli e Romane komunitetesko ani Kultura thay
Historia e Prizrenoska Komunako
Romano komuniteti sinele mahatno – importantno roli ani kultura thay
historia e Prizrenoski, kontributingya ano but aspektya e forosko sar
odova socialuno, kulturako thay ekonomikuno jivdipe. O Roma ano
Prizren siton penjarde vash olengi influenca ano keripe thay baryaripe e
zanatyengo, muzikako, tradiciako, thay qhibyako.
Historia e Romane komuniteteski ano Prizren: O Prizren, sar foro e
purane tradiciencar thay sar kulturako centro vash o regioni, isile yekh
shelbershuno Romano komuniteti. O Roma sine thanutne ano akava foro
sar kotar o Otomansko periodi, kote sine kotor tari socialno thay
ekonomikani struktura taro Otomansko Imperia. Ko akava periodi o
Roma sine penjarde vash olenge zanatia sar so si o metalokeripe
(kovaqya), kashtuni buti (sevla), phuvyake butya agrokultura thaj javera
artizanatsko janglipya so dena sine kontributi ko baryaripe e kinipe
bikinipesko thay ekonomikano evolviripe ano foro Prizren.
Kultura thaj Tradicie: O Roma ano Prizren garavde barvalo kulturako
kustikipesko barvalipe, kova mothavdilo ani muzika, kheliba, thay
artizanatya. E Romani muzika sila bari influenca ki lokalno kultura, e
ritmencar thaj e melodiencar kola ule kotor e ververutne festivune
eventyengo thay ceremoniengo. Tradicionalno instrumentya sar so si o
tupani (goqi), zurla, darabuka, violina, klarineti, thaj dahira si kotor taro
muzikako barvalipe e Romane komunitetesko thay but droma
vastingyona ini e yaverendar ano biyava, festune eventya, thay yaver
socijalno kedipya.
O kheliba si yaver mahatno – importantno aspekti ki Romani kultura,
thay nesave khelibaske tradicie si pandar ko foroske tradicionalno
festivalya. Ini o Roma si penjarde palo poro ažutipe te organizingyon
thay te garavgyon o ververutne foroske festivalya thay kulturake
aktivitetya kola sikavna yekh mikso kotar o ververutne – diferentne
tradicie thay zakoyna save si phangle e historiake periodyenca.
Bi dikhle o pharipya vash olengo may shukarno thay beraberuno
integripe ano malipe, e Roma khelde mahatno importantno rola te ano
bayaripe o mozaikosko e kulturengo ano foro Prizren thay te
zorakerenpe o socialo phanglipe mashkar e diferentne etnikane grupe
save jivdinena ano foro. O Roma dena kontributi te adikerelpe e
socialuno harmonia thay si mahatno – importantno kotor vash o forosko
evolviripe maybut ano artizanateske thay kinipe bikinipesko kotor.
Romano komuniteti ano Prizren sinele thay sile baro impakti ani kultura
thay historia e foroski, kontribuingya ano barvalipe e socialune,
kulturake thay ekonomikune jivdipasko. Bizo o pharipe so nakhle thay
nakhavena pe nakhipe, o Romano komuniteti garavgya thay
evolviringya pere tradicie, ovindoy yekh mahatno – importantno kotor e
foroska kulturake barvalipesko.
