Informingyona kay sah e may purana mahalake dizutne, e Terzimahalake, akhardi Nusret Seharsoy, kay arat pe ora 20:00 ano Parno Kher si te adikergyol agoruno kedipe vash informipe  sar ka phiravgyol e ceremonia e Bayrakoske Diveski.

Ano akava kedipe qhingargyona na saday Terzimahalake roma, numay vi o aver roma thay na roma kola si interesime te shunen pandar yekh ver sar ka phiragyol e ceremonia.

Akava kedipe realizingyola vash mobilizipe, informipe thay may bare kotorleipasko vazdipe, kay taysa e festa vash o Hedenebiri, te ovel so may shukar festuimi.

Bayrako ka iklol pe ora pashe 10:00 anglo udar e Bayraktareske kheresko, napal pe ora 4 palo ruqko, si te iklol tekbiryencar kotar sah e Terzimahalake dizune, aktivistya thay bayraktaryengi familia ji ko parno bar thay ji ko dubo, thay napal ka iranelpe pe thane, kote palo 4:30 si te shrdinel ano Parno Kher o vakeripe kotar e Shirina Mona – bayraktara, dersi kotar o hoxhalarya, ilahie thay Kuran-esko gilaipe thay yekh lafi-muhabeti vash e Bayrakosko Divesko Vasnipe vash e Romani Kultura, Historia thay Identiteti.