Sar dikhyola buderi politikanya e Nismake, na siton yekhe godinipe pere sherunea e Fatmir Limaj-ea, feriso ov agorutne dive dikhyola but pashe e Vetvendosya.

Erati, ano Prizren, o sheruno e krangako Zafir Berisha, ulagya yekh informipe ani piri socialuni rafin kay cidisalo kotar e Nisma thay formiringya yekh partia Demokrativuno Yekhipe ano Prizren.

Berisha mangla suksesya vash e Nisma thay phengya kay ov thay leske khetane butikerutno o politikuno aktivizmo ka iranen ki partia Demokrativuno Yekhipe ano Prizren.

Palo, Zafir Berisha, yekhatar vi o Pranverim Berisha – Direktori e Urbanizmosko thay e Ambienteske Planifikipesko thay Ramadan Tarashaj – Direktori e Turizmesko thay e Regionalune Avansipesko ano Prizren, ulavde e neva partiaki fotografia.