Erati, ano drom “Ibrahim Rugova” ani Gilana hramisalo yekh pharo ovipe kote trin personya tasavdile thay yekhoro lindisalo. O viktime sine o dat, o qhavo thay o jamutro, jikay o lindimo si ani phari situacia.

Kosovaki Policia rodena e Mefail Shkodra thay leskere duye qhaven sar bipakyavutne e akale trin jenenge masakrako, thay yekhedromea rodena phikoipe kotar o dizutne vash khetano butikeripe te sine kay dikhna akale upreleparne manushen kola si nashle.

Akava ovipe vazdingya bare reakcie kotar buderi politikune reprezentya sar ano lokaluno ayekha vi ano centraluno niveli kote saren si mamuy akale sureske thay moldinenole sar biakseptimo vash e diz.

Sheruno e Dizako, Alban Hyseni dengya alav kay ka kerel khetano butikeripe e rendoske organencar thay iranipe e stabilitetesko ani diz.

Vi e Rashtraki Sheruni, e presidenta Osmani, reaguingya vash akava akti akharipa sar yekh pharo thay dararno akti thay ajukerla shandipe thay kotar e Siguriake Organya te lenmpe akale suroa ji so may sigyuno arakhipe e bipakyavne personyengo.