Siklipeski thay Skenciaki Ministria, Divizia vash Komunitetyengo Siklipe, si te realizinel yekh truyali mes organizimi vash te hraminel o 5.to novembro – Romana Qhibyako Mashkarselikano Dive.
Pe data 6.to oktombro, Paraskini Dive, startipa pe ora 11:00 ano Restaurant Pashtriku ano Prizren, e ry. Gjyzel Shaljani – reprezenta vash e romane komunitetesko siklipe informinela amari media kay ka realizinen e truyali mes vash te diskutinen o mahatnipe e garavipasko, laqharipesko thay avansipesko e romana qhibyako ano Kosovako siklipesko sistemi, potenciripa o buhlaripe e siklipesko e romana qhibyako ano komune kote jivdinela o romano komuniteti, laqharipe thay yaveripe e planprogramyengo thay skolake tekstyengo, vi ayekha zorakeripe e institucionalune thay profesionalune khetanebutikeripasko.
Desar akalestar rayni Gjyzele Shaljani – dikhlarela te identifikingyon vi o aktualune sfide thay te ikalgyon konkretune rekomandipya vash avansipe e romana qhibyake sikavnengo thay siklipesko astaripe.
Ano truyali mes sar panelistya ka len kotor: Nazan Safqi – sheruni e Dizivaki vash e Komunitetyengo Siklipe, Urma Menekshe – Romana Qhibyaki Sikavni ano Prizren, Avdi Misini – sikavno e romana qhibyako thay kulturako thay Selahetin Kruezi – autori e romane siklipeske tekstyengo.
