Prizrenoski Temeluni Prokuroria adikerla konferencia vash o medie vash e akcia mamuy o Komisionerya kola si te puqlon vash o qoripe e votengo ani Prizrenoski Komuna.
“Angle nesave dive siyem angloinforminde kay e votengo manipulipe si krimi thay si te brandingyol bikompromisesko”, sine anglune alava e Sheruneprokuroreske, Petrit Kryeziu.
Prokurori Petrit Kryeziu phenla kay e Prokuroria thay e Policia ano dive e alosaripyengo, e 28.to decembaresko kerdi piri buti, numay akate o manipulipe thay falsikipe e votengo ulo ano genipaske centarya kotar korkore e bare partienge komisionerya. Akava gendo te ovlay sine deshencar yase shelencar bango shay na lelola pe dikhipe numay o gendo e qoripasko e votengo yase falsifikipe ulo ji pe 6 mile vote.
Thay adive shrdipa taharakostar realizisalo yekh rekordyuni operacia ano Prizren yekh e may barendar kay realizimi e Kosovaki Policia. Arestisale 106 persoyna kola kerde buti sar komisionerya. Buderi olendar vi familiake pashutne e deputetyenge kotar o bare partie vi kotar o minoritarune partie.
