Prizrenosko Ternengo Guvernipe realizingya sah pere aktivitetya kola ulavgya mashkari yekh agenda vash te janglarel sah e ternen ani Prizrenoski Komuna.
Mashkaro realizime aktivitetya sine: e ternengo maladipe e DKRS-eske direktorea, r. Arhim Ajazi ano yekhto dive kova realizisalo pe data 6 septembro ano Ternengo Kulturuno Centro, ano duyto dive lansirisalo thay diskutisalo o Dokumentarno filmi ‘Devulucioni’ e kreatoresko Endri Maloku, pe data 8 septembro sinelen muzika live, pe data 9 septembro sinelen maladipya e Prizrenoska Komunake nesave direktoryencar thay ano agorutne dive ani online forma realizinde o traynipe e tema “Volunterizmo thay ternenge aktivitetya”.
Janipeya kay siyem ano pandemiako vahti thay leipa pe dikhipe o mase kotar e Sastipeski Ministria sakova aktiviteti sinele limitimo kotorleipe, kote may buderi se 30 terne nashti lele kotor.
Ini o Radio ‘Romano Avazo’ ano akava qhon dedikimo vash o Terne realizingya nesave emisie kote korkore e ternencar tretirisali akaya tema vash te vazdingyol medialuni diskucia phando e ternenge sfidencar, suksesyencar thay rodlaripyencar.
Ano agorutni emisia e tema ‘o Terne’ sinemen yekh misafiri kotar e Ternengo Guvernipe, e ry. Qendresa Beluli.
Qendresa Beluli yekhto ver lela kotor ani yekh medialuni emisia. Ani emisia oy mothavgya o aktivitetya dedikime vash o ternengo qhon kote vi oy sine kotorleutni feri so oy si kotor e organizaciaki ‘e Prizrenoski Ternengi Kupatini’ sar yekh e krangyendar e Kosovake Ternenga Kupatnaki.
E ry. Behluli gendinla kay akana e ternengi situacia si ano yekh may laqho niveli, janipeya kay may angleder o terne nashti janenay phando biraipkane organizaciengo butikeripe. Janipeya kay akana mashkaro medialune rafinya may but shay te promovingyol lengiri buti.
Ani aver rig, oy phenla kay o BRO nashti phiravna poro butikeripe bizo phikoipe.
“o Institucie musay te phikoinen e biraipkane organizacien ano duy forme sar si moraluni thay financionaluni. O terne may but phikoingyona kotar o BRO kote mashkari volunteryuni buti avansingyona thay profesionalingyona o terne. Numay, janipeya kay o BRO saday uqharna o aktivitetyenge thay materialyenge pokipya doleske ini manglape may baro phikoipe.”, phenla e ry. Behluli.
Yekh e problematikyendar kay diskutisali si o Ternengo Centro. ry.Beluli ajukerla kay o institucie te keren yekh Ternengo Centro. Mashkaro lako godinipe o terne thay o BRO musay te keren may bari presia, ini seske buderi e rodlaripyendar gele ko kashuke kana.
E Qendresa sila yekh rekomandipe sar shay alosargyola akava but bershuni mangipe e ternegno ani Prizrenoski komuna.
“o Terne manlape te len kotor may but ano Publikune Shunipya thay te thoven sakoya ver poro rodlaripe vash o Ternengo Centro. Kana reslam te ovelmen yekh Ternengo Kulturuno Centro sit e ovelmen vi e Ternengo Centro.”, sine e Qendresake pozitivune alava.
Amari misafira pe agor dengya vi nesave aver rekomandipya vash sa o civilyuno amalipe thay o institucie.
Rekomandipya kola dengya e Qendresa Beluli si:
• BRO te lungyaren poro aktivizmo jikay o institucie te den moraluno thay financionaluno phikoipe.
• Prizrenoski Komuna te gatiserel yekh stratigionaluno plani vash o realizipe e Ternenge Centrosko.
• Edukipaske Institucie te qhiven ano program thay te ovelolen yekh ora vash o naformaluno edukipe kote e ternengo interaktiviteto thay diskutipe e godinipyengo si te ovel may baro.
• terne te oven kotorleutne e BRO-engo kote mashkaro volunteruno angazhipa si te avansingyon, profesionaluziningyon thay te vijainen grantya vash te realizinen pere ideye
