Selahetin Kruezi
Biyasalo pe 25.08.1960. ano Prizren. Sine sikavno ani Mamusha thay po kamipe vash Roma thay Romengi emancipaciya shrdingya te mothavel 1989. bershestar sar aktivisti e amalipasko “Durmish Aslano”. Anglune butya pi romani qhib lela te hraminel 1990. Bershtestar, may anglal poezie napal drama thay pustika vash o qhavore, vi aykeha ov formiringya e romani abeceda, koya vastingyola ano publikime pustikya thay medie. Ov pinjargyola sar yekh e jenendar kola formirinde o Romano Teatro. Sine yekhvaruno sekretari e amalipasko “Durmish Aslano”.
Ov si o yekhto autori kotar o romano komuniteti ano Prizren kova hramingya e drama e anavea “O Kamipe na Puqela”, koya mothavla e romenge adetya ano Prizren thay may buhle. Akaya drama angluni ver kheldili pe bersh 06.06.1992. ano Prizren koya sinela baro suksesi. Selahaten Kruezi lelape but bukyencar sar: drame, poezie, paramisya, biltenencar. Ov si hramarno, rodlarno vash Romani qhib, historiya thay kultura. Ov jivdinela ani Danimarka thay lugyarela te del kontributi vash e romengi emancipacia.
