Ani ceremonia kote pelardile ki godi o romane thay sinti viktime e Holokausteske ano Lety u Pisku, sheruno e Cekiake Senatesko, Milos Vystcil deklaringya kay e Cekiaki Konstitucia refuzinla etiketipe e manushengo sar “parazitya” yase “inferiorya”. Ov reaguingya mamuy e politikanyenge agorune deklaracienge kola kritikuisale kay kerena diskriminacia pederal o haricune komunitetya.

Ceremonia adikerdili ano eks kampi ano Lety u Pisku, kote internisale o roma thay o sintya ano Duyto Sumdalesko mareva, kote buderi olendar mule kotar i bokh, nasvalipya thay o namanushikane kondicie jikay o avera deportisale ano samudaripasko kampi Auschwitz. Vash o romano komuniteti o kampi Lety konsideringyola sar simboli e mudaripasko thay historikune diskriminaciako.

Sheruno e Senatesko, Vystrcil phengya kay e demokracia thay o Krisi garavla o beraberipe thay o dinyiteti e sakole dizutnesko. Ov kritikuingya o iranipe e fashistuna retorikako ani politika, feriso o romane organizacia thay e manushikane hakayenge reprezentya mothavde kay e fashistyengi propaganda ano bersha 1930 thay 1940 sine kay o minoritetya te dehumanizingyon angleder tasavipe.