Romano Teatro, kova pala peste mekhla 36 prezentime premiere thay khelde shelencar drame ano yaver-yaver Kosovake diza thay ano diza e eks Yugoslaviake.

Anglune bajakaya vash te formiringyol o Romano Teatro ule ano bersh 1989 bersheste talo Prizrenosko Teatro ani iniciativa disave romane intelektualyengi, Orhan Galushi, Kuytim Paqaku, Selahetin Krueziu, Shaip Menekshe, Bahlul Galushi, Elez Berisha thay yavera. Angluni ver ani skena thovgyola muzikaki- Nejip Menekshe 9 poetikuni performanca (interpretipe e poeziyengo), khardi “O Ilo phravela pere phaka” kolaki rejia kergya o Behlul Galush. Angluni ver ano teatroske phala ushkavna romane amateryune artistya: Bayram Galushi, Nejip Menekshe, Liriye Qeshmeji, Dashurie Avdo, Haki Qulanji thay e Julia Avdo kola interpretime thay dende duho e Rabindranath Tagoreske poezie.

Akava eksperimentaluno khelipe performisalo ano KAA Durmish Aslanosko 20. yubilarune bershesko manifestipe, vash akava sebepi o bersh 1989 kondiseringyola bersh kote qhivdile anglune bajakya vash te formiringyol e teatroski sekcia. Ini soske may angleder ano ver-verune organizipya kheldile skeqya numay akava teatraluno kotor konsideringyola sar may mahatno thay seriozuno bajako vash e teatrosko formiripe. Palo akava, bayrola o mangipe vash teatralune resipya thay akaleske Roma amaterya ini resena may bare resipya kote olenge ashutipe dela e Prizrenoski diz, o kulurako kher, o direktori thay olesko bukyarno stafi. Olengo ashutipe ano evolviripe thay anglipe e Romane Teatrosko ano Prizren si baro. Ano bersh 06.06.1992 o Romano Teatro iklola angluna seriozuna dramaha – tragediya khardi “O kamipe na puqela” kotar o autori Selahetin Krueziu. Drama lelape socio-ekonomikune problemeya e korkore komuniteteske, kolaki rejia kergya o Kuytim Paqaku.

Adisuni suksesuni buti, e Romane Teatroske dela epilogi e instituciako, vay baza vash reprezentipe e kulturako e yekhe komunitetesko. Hari sima emocie kay mange dengyola e rola te ovav hramutno e anglovakeripesko vash e monografiya “30 bersh buti e amateryune Romane Teatrosko ano Prizren”. Akava, hakoa potencirinava, feri so mangava te dav tumenge pe janipe kay akava shay manglape sine te hraminel daykhoro kotar amare “pionirya-veteranya” romane intelekualya. Soske “pionirya –veteranya” feri so on si odola, kola qhivde poro teri thay piri buti, amare sikavne kolenge ideyencar thay patriotizmeya phirgyam olenge dromencar.

Pandar yekh umal prekal koya promovingyola e kultura e yekha populaciako, kote moro komuniteti sinele dikhlarde suksesya si o Romano Teatro. Odoleske kay si klaro kay prekal o teatro promovingyola e etnologiya, palo odova, foklori, qhib, tradiciya thay sa yavera kova janglarla vash identiteto yekha populaciako, kote o romano teatro dikhlarla sar baza institucia koya reprezentinla sahastardi kultura pere komuniteteski.