Agorutne dive kosovaki retorika thay ofisionaluni politika isitoy zorakerdi,a sebepi isito diklardo achavipe kota habaske produktya ano kinbikinipe ani nurduni Kosova.

Numay ofisionalune thay srbyune biznesmenya  vakerna kay dizune pe akava kotor e Kosovako isiton ano prago e humanitaruna krizako,kosovake ofisionalune vakerna kay isito yek “nevo”srbyuno scenari.

Sherunoministri e Kosovako Ramush Haradinay,angledo nesave dive deklaringya kay isile ispati vash iprovizipe e humanitaruna krizako ani  nurduni Kosova, thay na ka mekhel kay dizune pe akava kotor  e Kosovako te ovel diso na shukarno.

“Janiba siyem kay angledo duy trin kurke truyal  akale planea vash impovizipe e humanitaruna krizako,  sine  transveri e ulavde produktyengo ano khera ano aver obyekti.Isimen ini  ispati kota akava scenari,manusha kola lena kotor.Amen  na ka mekha te na ovel  ni yek produkti, feri so isiton Kosovake dizune, numay  ayeka proyektya isiton shasherime, feri so na siton  pe shelibersh,on isiton  nakli metoda”,deklaringya sheruno ministri e  Kosovako.

Sheruno e Mitrovicako Agim Bahtiri vakergya  te sine kay Srbiya mangla te kriirinel humanitaruni kriza ani nurduni Kosova,kay ayeka diso na ka meklol,feri so ini olengi komuna na ka mekhol ayeka diso,feri so ovela vash politikuni, a na humanitaruni kriza.

Haki Shatri deutno godi e sherunemistresko Haradinay ani divuni gazeta”Zeri”deklaringya kay  isitoy buti  vash Ofisionaluno Beograd kova dela tensiya  ayeka kay Kosovo te achavel  taksa ano inporti e srbyune malyengo.

Numay, kosovake thay srbyune politikanya dena  pe  janipe  e dizutnenge ani nurduni Kosova kay na ka mekhenolen ani sevli e “sezdripaski”.

Numay,kay ani nurduni Kosova phardela humanitaruni katastrofa angluno deklaringya  dirktori kancelariako vash Kosovo thay Metohiya Marko Juriq.

Ani informaciya kota kosovake mediye vakerdilo kay kosovake Srbyenge janlardilo te na piyen pani kota Gazivoda feri so isitoy phandi,yeka forata  reagingya kancelariya  pe koleste isito pe cekat Marko Juric.

“ Prishtinake manglape te ovel laj sebepi  e hovavne nevipyengo thay bishuzho pani ani Gazivoda,ayeka kay paraskini dive e Srbiya ka lel nevi hanig thay may baro siguripe,te  na oven umlavde kota achavipe ani Prishtina”.

Numay,srbyuno presidento  Aleksandar Vuqic yek harno vahti dela  pe  janipe numay penjarla kontra mere sebepi Kosovake raipesko vash inporti  e srbyune malyngo.

Yekaforata palo khuvipe e forcako vash akava decisipe sine informaciya kay ani nurduni Kosova na si shayutno te kingyon srbyuno mali.Kosovaki policiya  achagya  servisi e ulavipasko odova ilegaluno e habasko thay aver produktya kota Srbiya, ayeka kay angledo duy chona kosovaki policiya  lela akciya  e arestipaski kota pere kolegya ini ani nurduni Kosova sebepi e bipakyavipasko kay on  lele kotor  ano  ver verutne  penalune ovipya e kontrabandako.

KosovaLive - Violeta Oroshi Berishaj